Ձեր վստահելի աղբյուրը

Լարսի անցակետը փակվելու մասին Հայաստանում հայտնի դարձավ  հունիսի 23-ի երեկոյան:

 Հայաստանից Վրաստանի սահմանը դեռ չհատած Արարատի բնակիչը, ով պատրաստվում էր սեփական մեքենայով հերթական փոքր  խմբաքանակով ծիրանն արտահանել դեպի Կրասնոդար, ստիպված հետ է վերադառնում:

«Հունիսի 24-ի առավոտյան հասանք Վրաստանի սահման: Անցակետում տեղեկացրեցին, որ Լարսը փակվել է: Շոգ էր:  Մի քանի ժամ սպասեցինք, հուսադրող որևէ բան բացվելու մասին չէին ասում, ծիրանն էլ շոգից սկսել էր փչանալ: Ստիպված հետ դարձանք»,-Panorama.am-ին պատմեց նա:

Հնարավորինս շուտ ծիրանը ծախելու ու ակնկալվող վնասի չափը նվազագույնի հասցնելու համար փորձում են միրգն իրացնել Վանաձորում: Չի հաջողվում: Հետո փորձում են Գյումրիում:

«Էժան «թափեցինք», եկանք: 2 տոննայի մեջ 150 հազար դրամի վնաս եմ կրել»,-ասաց նա:
Այս պահին քանի՞ հայկական ավտոմեքենա կա Լարսի անցակետում՝ հայտնի չէ: Չկան ընդհանուր հաշվարկներ, թե ընդհանուր առմամբ արտահանողներն ինչքան են տուժել:

Պաշտոնական միակ տեղեկատվությունն այն է, որ հունիսի 26-ի ժամը 10.00-ի դրությամբ Վրաստանի ՆԳՆ ԱԻ դեպարտամենտից տեղեկություն է ստացվել, որ քարաթափման հետևանքով ժամանակավորապես փակվել է Վերին Լարսի անցակետը:

Նախնական տվյալներով անցակետը փակ կլինի մոտ մեկ շաբաթ: Թերեք գետի մակարդակի բարձրացման հետևանքով առաջացել է ջրածածկման վտանգ:

Ավելի վաղ գյուղատնտեսության նախարարությունից հայտնել էին, որ  պտուղ-բանջարեղենի  արտահանումների գործընթացն անխափան իրականացնելու նպատակով «Սպայկա» ընկերությունը վարձակալել է երեք լաստանավ, որոնցով  «Փոթի» նավահանգստից երկու օրը մեկ պարբերականությամբ  բեռնափոխադրումներ կիրականացվեն դեպի Նովոռոսիյսկ և հակառակ ուղղությամբ: Առաջին բեռնափոխադրումըիրականացվել է  հունիսի 25-ին երկու ուղղություններով:

«Առաջարկում ենք   արտահանողներին օգտվել  վերոնշյալ այլընտրանքային ուղուց, որը շուրջ 300 կմ-ով կրճատում է ընդհանուր ճանապարհը»,-ասված է ԳՆ հայտարարության մեջ:

Հունիսի 22-ի դրությամբ արտահանվել է 5675 տոննա ծիրան՝ նախորդ տարվա 2710 տոննայի փոխարեն, ծիրանի արտահանման օրական միջին ծավալը կազմում է մոտ 600-800 տոննա: