Ձեր վստահելի աղբյուրը

Ազգային ժողովի պատգամավոր Ալեքսանդր Արզումանյանը այսօր ԱԺ արտահերթ նիստում հիշեցրեց իր՝ նախկինում արած առաջարկը նույնականացման քարտեր տպագրել ու բաժանել ժողովրդին, որով նրանք կարող էին մասնակցել ընտրություններին։

«Դուք այն ժամանակ պատճառաբանեցիք, թե ֆիզիկապես անհնար է, գումարներ չկան, և այլն։ Բայց հիմա դուք բերում եք մի մեխանիզմ, որով մուտքագրում եք մատնահետքեր ու նախագրանցում մարդկանց։ Եկեք 16 միլիոնը տարբեր մասերի բաժանենք և այն սարքավորումը, ոը անհրաժեշտ է մատնահետքեր ֆիքսելու համար, գնենք, իսկ մնացածի դեպքում մինչև ապրիլ հաջորդ տարվա բյուջեով կնախատեսենք», -առաջարկեց Արզումանյանը։

Նրա համար տարօրինակ էր, որ կառավարությունն առաջարկում է օրենքում փոփոխություն, բայց պայմանով՝ եթե գումար գտնեն կիրականացվի նախագրանցում, եթե ոչ` ուրեմն չի ստացվի։

«Արժանապատվության խնդիր է. Ազգային ժողովը քննարկում է օրինագիծ, որի հետ կապում է ընտրական ողջ գործընթացը։ Սենց չի կարելի», -նկատեց Արզումանյանը։

Ի պատասխան՝ կառավարության աշխատակազմի ղեկավար-նախարար Դավիթ Հարությունյանն ասաց, որ կառավարությունն իր առջև դրել է երկարաժամկետ կտրվածով լուծման խնդրներ։

«Մենք պլանավորել ենք ժամանակի ընթացում, աստճանաբար անցնել նույնականացման քարտին ու այդպես էլ անում ենք։ Հիմա խոսքը գնում է լրացուցիչ աշխատանքի մասին, որի համար կառավարությունը նպատակահարմար չի գտնում գումարներ ծախսել։ Մենք ունենք երկարաժամկետ ծրագիր, որով առաջնորդվում ենք։ Մեզ դոնորները բազմիցս ասել են, որ պատրաստ են աջակցել, մենք էլ ասում ենք՝ եթե պատաստ եք աջակցել, մենք կարող ենք դա անել։ Մենք ուզում ենք դա անել։

Բայց մենք պատրաստ չենք դրա համար գումարներ ծախսել: Մենք դրա համա գումարներ չենք նախատեսել ու չենք  էլ նախատեսելու։ Այս ընտությունները անհամեմատ ավելի թանկ են նստելու մեզ վրա, քան նախորդ բոլոր ընտրությունները», -հավելեց Հարությունյանը՝ ընդգծելով, որ իրենք արժանապատվորեն կատարում են իրենց աշխատանքը։

Իր արձագանքի ժամանակ Արզումանյանը նկատեց, որ կառավարությունում մեծ մասը բիզնեսմեններ են և կարելի է հեշտորեն գումար գտնել պահանջվող կայանները գնելու համար։

«Անձնական բիզնեսի ոլորտում շատ լավ աշխատում եք, մեքենաներ եք վաճառում, կրճատում։ Սա էլ դիտեք որպես բիզնես, էդ պահանջվող սարքավորում-կայանները գնեք, գործը արեք, հետո վաճառեք», -հավելեց պատգամավորը։

«Բիզնեսի ոլորտում ձեր գիտելիքները և իմ գիտելիքները շատ չեն տարբերվում, այսինքն՝ զրոյական են, և դրա համար այս հարցը կթողնեմ անարձագանք», -իր հերթին պատգամավորին արձագանեց կառավարության ներկայացուցիչը։

Հիշեցնենք, որ քաղաքական ուժերի միջև համաձայնության ադյունքում Ընտրական օրենսգրքում կատարվել էին փոփոխություններ, որոնց համաձայն, խորհդարանական ընտրություններից առաջ նախագրանցում կատարելու համար անհրաժեշտ է ձեռք բերել տեխնիկական միջոցներ, ինչի համար պահանջվում է 16 մլն եվրո։ Այդ գումարները կառավարությունը ձեռք բերելու համար բանակցություններ է վարում դոնոր կազմակերպությունների հետ։