Ձեր վստահելի աղբյուրը

Արամ Խաչատրյան համերգասրահում  կայացավ Հայաստանի ազգային ֆիլհարմոնիկ նվագախմբի հիմնադրման օրից ի վեր գրեթե բոլոր հիշարժան համերգների ու իրադարձությունների, ակնառու հյուրերի ու դիրիժորների մասին պատմող «Հոբելյանական նոտաներ» ֆիլմի պրեմիերան: Վավերագրական ժանրի ֆիլմը պատրաստվել է «Շարմ» հոլդինգի և Հանրային հեռուստաընկերության պատվերով, ՀՀ մշակույթի նախարարության աջակցությամբ համատեղ գործակցության արդյունքում: Բեմադրող ռեժիսորն է Ավագ Ավագյան, սցենարի հեղինակը Սոնա Ալեքսանյանը:

Նախքան ֆիլմի պրեմիերան լրագրողների հետ հանդիպման ժամանակ «Շարմ հոլդինգի» տնօրեն Կարեն Ղազարյանն ասաց, որ մեծ պատասխանատվությամբ են անդրադարձել այս աշխատանքին:

«Այս ֆիլմը ոչ միայն ֆիլհարմոնիկի մասին է, ներկայացնում է նվագախմբի նվաճումները երաժշտության բնագավառում, այլ նաև մեր ազգի հաղթանակներին է նվիրված, քանի որ եթե չկարողանանք ազգովի դիմադրենք դժվարություններին, ազգովի չունենանք հաղթանակներ, չենք ունենա նաև մշակույթ, և հակառակը՝ եթե  չլինի բարձր մշակույթ, բարձր արվեստ, մենք ճենք կարող գոյատևել»,- նշեց նա:

Ըստ Կ. Ղազարյանի, կարևոր է ֆիլմը նաև այն առումով, որ  դաստիարակչական նշանակություն կունենա եկող սերուդների համար:

«Այսօր, ցավոք սրտի, մեր շուրջ նկատվում է անգրագիտություն, ոչ ճաշակով երաժշտություն, արվեստ: Ցույց տալով մեր ֆիլհարմանիկի անցած ուղին,  արվեստը, հնարավոր է եկող սերունդներին ճիշտ ուղու վրա դնել»,- ասաց նա:

Այսօր  Մաշտոցի 43 հասցեում (Խամաճիկների թատրոնի հարևանությամբ)  տեղի ունեցավ նաև 1924-1926թթ. նվագախումբը ղեկավարած Դիրիժոր, կոմպոզիտոր, գեղագետ, մանկավարժ, ՀՀ արվեստի վաստակավոր գործի Արշակ Ադամյանի հուշաքարի հանդիսավոր բացման արարողությունը: : Հուշաքարի հեղինակն է Լևոն Վարդանյանը:

Նշենք, որ Հայաստանի Ազգային ֆիլհարմոնիկ նվագախմբի հիմնադրման 90-ամյակի հոբելյանական միջոցառումներն սկսվել են 2016-ի մարտի 4-ին  նվիրված մեծն Ալեքսանդր Թամանյանի հիշատակին նվիրված համերգով: