Ձեր վստահելի աղբյուրը

Հայաստանի տնտեսական զարգացման գործում հատկապես կարևորվում են Չինաստանի հետ առևտրատնտեսական ակտիվ հարաբերությունները: Այս մասին այսօր լրագրողների հետ զրույցում ասաց  այաստանի արդյունաբերողների և գործարարների միության նախագահ Արսեն Ղազարյանը՝ հավելելով, որ վերջին տարիներին զգալիորեն ավելացել է երկկողմ առևտրաշրջանառությունը:

«Ամեն տարի ունենք ապրանքաշրջանառության ծավալների ավելացում: Փորձում ենք հայկական պտուղ-բանջարեղեն, հյութ, խմիչք արտահանել Չինաստան: Կատակով ասում ենք՝ եթե մեկ չինացին տարին մեկ բաժակ հայկական ծիրանի հյութ խմի, ապա պետք է մեր ծիրանի ծառերը տասնապատկենք»,- նշեց Արսեն Ղազարյանը:

Այսպիսով, ըստ նրա, Չինաստանի հետ գործակցության նոր հնարավորությունները ստեղծելը օրախնդիր է Հայաստանի համար։

Արսեն Ղազարյանը հայտնեց, որ հունիսի 11–ին Չինաստանի Ճըձյանգ նահանգի Նինգբո քաղաքի ազատ առևտրի գոտու տարածքում կայացել է Հայկական ազգային ցուցասրահի հանդիսավոր բացման արարողությունը, ինչին մասնակցել են չին բարձրաստիճան այրեր, ՉԺՀ–ում Հայաստանի արտակարգ և լիազոր դեսպան Ս. Մանասարյանը։ Նինգբոն աշխարհի խոշորագույն քաղաք–նավահանգիստներից է, որ հիմնադրվել է դեռևս 738թ. և այսօր ունի 860 միլիոն տոննա բեռնման հնարավորություն։

Հունիսի 9–ին Նինգբոյում տեղի է ունեցել նաև Չինաստանի և Կենտրոնական ու Արևելյան Եվրոպայի երկրների սննդի փառատոնը և ցուցահանդեսը։ Մեկ օր անց կայացել է նույն երկրների կառավարիչների և քաղաքապետերի երրորդ համաժողովը, որին, ի թիվս աշխարհի 10–ից ավելի քույր–քաղաքների ղեկավարների, մասնակցել է նաև Հայաստանից Կապանի քաղաքապետը և ստորագրել բարեկամության և փոխգործակցության փոխըմբռնման հուշագիր։

Իսկ հունիսի 8-ին Հայաստանի արդյունաբերողների և գործարարների միությունը Հայաստանի առևտրաարդյունաբերական պալատի հետ համատեղ վավերացրել են Չինաստանի միջազգային առևտրային պալատի հետ կնքված Առևտրային և տնտեսական համագործակցության ռազմավարական համաձայնագիրը։

Միությունն ակնկալում է, որ վաճառասրահի բացումը կխթանի Հայաստանի ու Չինաստանի առևտուրը:  «Հայկական տարբեր արտադրողների արտադրանքից մի քանի բեռնարկղ արդեն արտահանվել է Նինգբո քաղաքի մոտ գտնվող առևտրական խոշոր կենտրոն և մենք հույս ունենք, որ արտահանման ծավալներն ավելանալու են: Մենք գործարարներին հորդորում ենք դիվերսիֆիկացնել իրենց արտահանումները՝ հույսը չկապելով միայն ռազմավարական գործընկերոջ՝ Ռուսաստանի հետ, քանի որ ֆորս մաժորային իրավիճակների դեպքում ճանապարհը կարող է ամիսներով փակ լինել»,- ընդգծեց Արսեն Ղազարյանը:

Ըստ նրա՝  հայ գործարարները պետք է փնտրեն այնպիսի շուկաներ, որտեղ ճանապարհի խնդիր չունեն: «Օրինակ՝ Չինաստանը, Հնդկաստանը, Կորեան, Ճապանիան այն տարածքներն են, որտեղ մենք խնդիր չունենք: Տարօրինակ է թվում, բայց հազարավոր կիլոմետրերի փոխադրման ինքնարժեքն ավելի էժան է, քան Երևանից Մոսկվայի որևէ մարզ կամ Ղազախստան: Միակ խնդիրն այն է, որ բեռները հասնում են 35-40 օրվա ընթացքում»,- ընդգծեց նա: 

Այսպիսով, Հայաստանի արդյունաբերողների և գործարարների միության ու Հայաստանի առևտրաարդյունաբերական պալատի ներկայացուցիչները հուսով են, որ Նինգբոյի ազատ առևտրի գոտու տարածքում բացված Հայկական ազգային ցուցասրահը նաև կնպաստի տարբեր երկրների հետ գործարար կապերի հաստատմանը:

Չինաստանում ՀՀ առևտրաարդյունաբերական պալատի ներկայացուցիչ Արթուր Եգորյանն էլ հայտնեց, որ պետք է որակյալ ապրանք արտադրել, որպեսզի չինական շուկայում այն մրցունակ լինի: Բացի այդ, պետք է ծավալներն ավելացնել, որպեսզի պահանջարկը բավարարեն:
Ըստ նրա՝ արդեն համագործակցում են 12  հայկական ընկերությունների հետ, որպեսզի մինիմում ծախսերով նրանց արտադրանքը տեղափոխվեն Հայկական ազգային ցուցասրահ: