Ձեր վստահելի աղբյուրը

Ավան վարչական շրջանում բացված համալիրի բազմաբնակարան շենքերում տեղադրվել են Էլեկտրաէներգիայի արդիականացված հաշվիչներ` հայտնեց «Հայաստանի էլեկտրական ցանցեր» ՓԲԸ ավտոմատացված հաշվառման համակարգի սպասրկման ծառայության պետ Միքայել Կուդոյանը:

«Այս շենքերը ներառված են ՀԷՑ-ի կողմից ներդրվող նոր արդիական էլեկտրաէներգիայի ավտոմատացված համակարգի մեջ: Համակարգի մեջ ընդգրկված բոլոր բաժանորդներն իրենց հաշվիչների ցուցմունքները կկարողանան տեսնել օնլայն ձևով, ինչպես նաև կկարողանան տեսնել նախորդ օրերին ծախսած իրենց էլեկտրաէներգիան»,-ասաց նա:

Միքայել Կուդոյանն ասաց, որ մուտքերի ու վերելակների հոսանքի ծախսը ևս հաշվվում է այդ ավտոմատ հաշվիչների միջոցով, իսկ դա իրավունք կունենա ստուգել համատիրության կողմից լիազորված անձը:

ՀԷՑ պաշտոնյան նշեց, որ բոլոր շենքերի մուտքի մոտ ցուցանակներ են փակցված, որտեղ բնակիչները կարող են ծանոթանալ համակարգին միանալուն:

«Ամենակարևորն այն է, որ բաժանորդը տանը նստած կարող է տեսնել իր հաշվիչի ծախսը ներկա պահին, կամ կես ժամ առաջ ինչ ծախս է ունեցել, իսկ որևէ միջամտություն հաշվիչի աշխատանքին բնակիչներն անմիջապես կարող են տեսնել: Այս համակարգը բացառում է էլեկտրիկ հասկացողությունը, քանի որ բաժանորդների սահմանված կարգով վճարումը չկատարելու դեպքում այն հոսանքն ավտոմատ անջատում է»,-ավելացրեց նա: