Ձեր վստահելի աղբյուրը

Ռուսաստանի Արտակարգ իրավիճակների նախարարության ավիացիայի միջոցով  կիրականացվի Վերին Լարսի անցակետում շրջափակման մեջ հայտնված Հայաստանի 147 քաղաքացիների տեղափոխումը: Այս մասին հայտնում է «Ռիա Նովոստի» գործակալությունը:

«Այսօրվանից Ռուսաստանի ԱԻՆ-ը նախատեսում է իրականացնել Հայաստանի քաղաքացիների տեղափոխումը: Միջոցառումն իրականացվելու է ավիացիայի միջոցով: Նախատեսվում է, ընդհանուր առմամբ Երևան կտեղափոխվի 147 մարդ»,-ասված է ՌԴ  ԱԻն տարածած հաղորդագրության մեջ:

Աղբյուրը, վկայակոչելով վրացական կողմին, գրում է, որ ավտոճանապարհի վերականգնման աշխատանքները կշարունակվեն ավելի քան 3 շաբաթ: Հունիսի 28-ի տվյալներով անցակետի մոտ սպասող մեքենաների թիվը հասել է 240-ի:

Ավելի ուշ ՀՀ ԱԻՆ-ից հայտնեցին հետևյալը. «Հունիսի 29-ին, ժամը 09.15-ին ՀՀ ԱԻՆ ճգնաժամային կառավարման ազգային կենտրոնից կապ է հաստատվել Հյուսիսային Օսիայի ՃԿԿ-ի հետ: Այնտեղից հայտնել են, որ Լարսի անցակետ տանող փլուզված ճանապարհին իրավիճակը մնում է անփոփոխ, վթարա-վերականգնողական աշխատանքները շարունակվում են, ստեղծվել է 2 վրանային ավան` նախատեսված 70 մարդու համար: Վրաններում մարդկանց տրամադրվում է տաք սնունդ և գիշերակացի հնարավորություն: Աշխատանքներ են տարվում ՌԴ սահմանային անցակետում գտնվող ՀՀ քաղաքացիներին ՌԴ ԱԻՆ օդանավով Հայաստան տեղափոխելու ուղղությամբ:

ՌԴ-ում ՀՀ ԱԻՆ ներկայացուցչի ուղեկցությամբ այսօր Վլադիկավկազի օդանավակայանում վայրէջք կկատարի ՌԴ ԱԻՆ ինքնաթիռը, որով նախատեսվում է Հայաստան տեղափոխել ՀՀ 156 քաղաքացու: Երթուղու ընթացքի և ժամանման մասին կտրվի լրացուցիչ տեղեկատվություն:

ՀՀ ԱԻՆ ՃԿԱԿ-ից իրավիճակի պարզաբանման և իրադարձությունների զարգացման վերաբերյալ տեղեկություններ ստանալու նպատակով պարբերաբար կապ է հաստատվում Վրաստանի ՆԳՆ ԱԻ դեպարտամենտի, ՌԴ ԱԻՆ և Հյուսիսային Օսիայի ՃԿԿ-ների հետ:

Ձեռնարկվող միջոցառումների գործընթացն ամբողջությամբ գտնվում է ՀՀ վարչապետ Հովիկ Աբրահամյանի ուշադրության կենտրոնում»:

Հորդառատ անձրևներից առաջացած սողանքավտանգ իրավիճակի պատճառով Մցխեթա-Ստեփանծմինդա-Լարս ավտոճանապարհի 134-135 կիլոմետր հատվածով երթևեկելը արգելվում է:
Սողանքը Վրաստանի ռազմավարական մայրուղիում տեղի է ունեցել հունիսի 23-ին: Թերեք գետը փոխել է իր հունը և փակել 800 մետր երկարությամբ ավտոմայրուղին: Ըստ նախնական տվյալների, գետի բնականոն հունը վերադարձնելու և ճանապարհի վնասված հատվածը վերականգնելու համար կապահնջվի մոտ երկու շաբաթ: