Ձեր վստահելի աղբյուրը

Այսօր Ազգային ժողովում ՀՕՊ համաձայնագրի քննարկման ժամանակ ԱԺ Հանրապետական խմբակցության ղեկավար Վահրամ Բաղդասարյանը հայտարարեց, որ կան մարդկային երկու խմբեր, որոնցից մեկը դեմ է ԵՏՄ-ին, ՀԱՊԿ-ին, իսկ մյուս խումբն էլ՝ ԵՄ-ին, ԵԽԽՎ-ին, ՆԱՏՕ-ին:

«Մենք մեր երկրի անվտանգության ճակատագիրը չենք կարող տալ այդ մարդկային խմբերին: Ես ձեզ հորդորում եմ, խնդրում եմ, ասում եմ՝ ռուսներին սիրում ես, թե չես սիրում, աղջիկ ջան, ում ոնց ես սիրում, ինչ ես սիրում, ձեր քաղաքական սեքսուալ հնարավորությունները միք տեղափոխի Ազգային ժողով: Սա պատկառելի ամբիոն է և չէի ցանկանա, որ նման համաձայնագրի քննարկումը նման մակարդակ կրեր», -հայտարարեց Վահրամ Բաղդասարյանը՝ ակնարկելով ԱԺ պատգամավոր Զարուհի Փոստանջյանին: 

Ի դեպ, Բաղդասարյանն այս մասին խոսելիս ձեռքով պարբերաբար ցույց էր տալիս այն շարքը, որտեղ նստում է «Ժառանգության» պատգամավորը:

Հիշեցնենք՝ տիկին Փոստանջյանը քննադատել էր ՀՕՊ համաձայնագիրը և հայտարարել, որ Հայաստանը դարձել է Ռուսաստանի արբանյակը:

Բաղդասարյանի խոսքով, Հայաստանը մեկուսացնել ցանկացող մարդկային խմբերին չի հաջողվի իրականացնել այդ ցանկությունը՝ «Դա անհնարին է»: Ավելին, պատգամավորը նկատեց, որ այսուհետև ցանկացած համաձայնագիր, որը կնպաստի երկրի անվտանգության ամրապնդմանը, Հայաստանը կընդունի:

«ՀՕՊ համաձայնագիրն ընդունելով, մենք չենք կորցնում մեր ինքնուրույնությունը, այլ մեծացնում ենք մեր հնարավորությունները», -ասաց իշխանական մեծամասնության ներկայացուցիչը:

Անդրադառնալով երկար չարկչրկված Ռուսաստանից 200 մլն դոլար վարկով սպառազինության ներկրման թեմային, Բաղդասարյանը ասաց, որ ամեն ինչ ճիշտ է արվում, ավելին, զգուշացրեց, որ այդ մասին որևէ ինֆորմացիա հանրությունը չի ստանա ու հավելեց.

«Այդ պայմանագրի իրականացումը երբ ավարտվի, մենք այս ամբիոնից կհայտարարենք, որ դա ավարտված է: դա առավել ևս նպաստում է իմ երկրի, մեր երկրի անվտանգությանը: Իսկ այն մարդիկ, ովքեր ժամանակից շուտ ցանկանում են ինֆորմացիա ստանալ, չեն ստանալու»: