Ձեր վստահելի աղբյուրը

Թուրքիայի վարչապետը սկսել է «լինել-չլինելու» խաղ խաղալ, այն է՝ փոխհատուցել, թե չփոխհատուցել ռուսական ռազմական ինքնաթիռի խոցման վնասի համար: Հակասական տեղեկությունները ՌԴ-ից ու Թուրքիայից՝ շարունակվում են։ Մինչ ՌԴ նախագահի մամուլի քարտուղարը հայտարարում է, որ Պուտին-Էրդողան հեռախոսազրույցում առկա է խոցված СУ-24 ռմբակոծիչի փոխհատուցման հարցը, Թուրքիայի վարչապետ Բինալի Յըլդըրըմը նույն ակտիվությամբ հայտարարում է, թե փոխհատուցման մասին խոսք չկա։  Այս մասին գրում է «asialive.info»-ն՝ հղում անելով «topwar.ru» կայքին:

Թուրքական NTV հեռուստաընկերությունը հրապարակել է վարչապետի հայտարարությունը, ըստ որի՝ «Ռուսական կողմին փոխհատուցման վճար տալու հարցը չի քննարկվում: Թուրքիան ընդամենը հայտնել է իր ափսոսանքը Ռուսաստանի Դաշնությանը»:

Միևնույն ժամանակ Յըլդըրըմը հայտարարել է, թե ռուս-թուրքական հարաբերություններում սառույցը սկսել է հալվել:

«Մենք հատկապես մեր շնորհակալությունն ենք հայտնում մեր եղբայրներին՝ Ադրբեջանին ու Ղազախստանին, այլ տարածաշրջանային երկրներին ու նրանց առաջնորդներին այս հարցում իրենց գործադրած մեծ ջանքերի համար: Մենք չենք սահմանափակվի միայն Ռուսաստանով ու Եգիպտոսով: Միջերկրական ծովի ավազանում և Սևծովյան տարածաշրջանում բոլոր հարևան երկրների հետ հարաբերությունների բարելավումը մեզ համար առաջնահերթություն է»,-մեջբերում է կայքը Թուրքիայի վարչապետի խոսքը:

Ըստ պարբերականի՝ եթե այսօր Թուրքիայի վարչապետը հրաժարվում է փոխհատուցման մասին իր իսկ հայտարարությունից, ապա ի՞նչն է խանգարում Թուրքիայի ղեկավարությանը վաղը հրաժարվել ներողությունից, նամանավանդ, որ Թուրքիայի նախագահի կողմից Կրեմլին ուղարկված ափսոսանքի մասին հայտնող նամակի վերաբերյալ որևէ պաշտոնական մեկնաբանություն չի եղել:

Մեր մեղմ կարծիքով՝ Ռուսաստան-Թուրքիա «սիլիբիլին» գնալով անկանխատեսելի է դառնում։