Ձեր վստահելի աղբյուրը

Շիրակի մարզի Արթիկ քաղաքում տեղի ունեցած  հեղեղումների հետևանքով բնակչությանն աջակցելու նպատակով, ՀՀ կառավարությունը մարզպետարանին հատկացրեց  22 մլն 350  հազար դրամ, ևս 2 մլն 430 հազ. դրամ էլ կուղղվի Արթիկում հեղեղումների հետևանքով անկած գյուղատնտեսական կենդանիների և մշակաբույսերի ցանքատարածություններին պատճառված վնասի դիմաց աջակցություն ցուցաբերելու համար: Հեղեղատարների մաքրման նպատակով էլ կտրամարդվի  16 մլն 965 հազ. դրամ: Այս մասին որոշումներն ընդունվեցին գործադիրի այսօրվա նիստում:

ՀՀ տարածքային կառավարման և զարգացման նախարար Դավիթ Լոքյանը հստակեցնելով՝ նշեց, որ ֆինանսական միջոցներ են տրամադրվում բնակարանների վերականգնման համար: Ստեղծված հանձնաժողովը, որ գործում է Արթիկի տարածաշրջանում, հաշվարկել է` մեկ բնակարանի համար հատկացնել մինչև 4 մլն 600 հազար դրամ, ինչը բավարար է կեցության նորմալ պայմաններ ապահովելու համար:

«Գնահատվել են բոլոր կորուստները, ցանքատարածությունների համար միջին բերաքատվությունն են հաշվի առել, շուրջ 1 մլն 700 հազար դրամի չափով ցանքատարածությունների վնասի փոխհատուցում կտրամադրվի, 650 հազար դրամի չափով էլ գումար կտրամարդվի խեղդված կենդանիների համար»,- ասաց Դավիթ Լոքյանը:

Ներկայացնելով Արթիկում ներկա իրավիճակը՝ նախարարը նշեց, որ այսօր քաղաքում արդեն բնականոն գործունեությունը հիմնականում վերականգնվել է, հեղեղատը բացված է, դադարել է նկուղներ ջրի հոսքը, գազիֆիկացումը վերականգնված է՝ բացառությամբ 8-10 շենքերի, որոնք հեղեղատի վրա տեղադրված գազից են օգտվում: Վթարներից խուսափելու համար այն անջատվել է: «Ջրամատակարարումը ևս քաղաքում վերականգնված է, բացի մի փոքր հատվածից, բայց այդ հատվածում քաղաքապետարանը հատուկ ռետինե խողովակներով ջուր է մատուցում: Էլեկտրականություն էլ 8-10 ընտանիք չունեն»,- ասաց նա:

Ըստ Դավիթ Լոքյանի՝ քաղաքի 2-3 փողոցների մաքրման աշխատանքներն արդեն ավարտվում են. միայն փողոցներից շուրջ 120 մեքենա քար և ավազ է դուրս բերվել:. «Գործընթացը  շարունակվում է: Նախարարության ներկայացուցիչները տեղում են: Ւմ փ ոխնախարարը լինելու է այնտեղ` մինչև աշխատանքները ավարտվեն»:

Վարչապետ Հովիկ Աբրահամյանն ասաց, որ անհրաժեշտ է իրազեկել նաև հանրությանը, քանի որ բազմաթիվ իրարամերժ խոսակցություններ, տեղեկություններ են տարածվում:

«Պարո´ն վարչապետ, Դուք եղել եք աղետի հաջորդ օրը, աղետի օրը ես ամբողջ գիշեր եղել եմ այնտեղ: Հիմա ամբողջ օրը պիտի հայտարարե՞նք, թե մենք ինչ ենք անում»,- ասաց Դավիթ Լոքյանը՝ նշելով, որ աշխատանքներ արվում են, բայց մարդիկ կան, որ «քաղաքական բաներ են անում՝ քաղաքապետ դառնան, ավագանի դառնան»:

Հովիկ Աբրահամյանը կրկնեց, որ պարտավոր են հանրությանը ճիշտ տեղեկատվություն տրամադրել, թե մարդիկ, քաղաքական գործիչներն ինչ նպատակներով ինչ կտարածեն՝ նրանց գործն է. «Մենք մեր արած գործի մասին պիտի խոսենք, ի՞նչ կա ամաչելու, պարո՛ն Լոքյան, եթե մարդն ուզում է քաղաքապետ դառնա, փնովում է կառավարության աշխատանքը, իմ կարծիքով՝ դա արդար չէ»: