Ձեր վստահելի աղբյուրը

«Բարձրագույն և հետբուհական մասնագիտական կրթության մասին» ՀՀ օրենքում նախատեսվող հիմնական հայեցակարգային փոփոխությունները կապված են ՀՀ կրթության և գիտության նախարարության ֆունկցիաների բեռնաթափման է և բուհական ինքնավարության կտրուկ աճի հետ: Այսօր Եվրոպական Միության կողմից ֆինանսավորվող «Հայաստանի բարձրագույն կրթության զարգացում Եվրոպական բարձրագույն կրթական տարածքին ինտեգրվելու նպատակով» թվինինգ ծրագրի փակումից առաջ լրագրողների հետ ճեպազրույցում ասաց ԿԳ նախարար Լևոն Մկրտչյանը:

Փոփոխություններից մեկն էլ, ըստ նախարարի պետք է լինի հայաստանյան բուհական համակարգի հստակեցումը. «Ըստ էության, մենք հիմա ունենք անթիվ-անհամար համալսարանների ցանց և համալսարան են կոչվում անգամ այն ուսումնական հաստատությունները, որոնց ուսանողների թիվը չի անցնում անգամ հարյուրը: Պետք է հստակեցվեն և լիցենզիոն պայմանները, և  համալսարան հասկացությունը, և ցանցային համալսարան գաղափարը, ինչպես նաև ինստիտուտ, հետազոտական համալսարան հասկացությունները, բուհական խորհուրդների գործուներությունը, համալսարանի ապաքաղաքականացման գործընթացը»:

Լևոն Մկրտչյանը նշեց, որ օրենքի նախագծումներն արդեն կան՝ սկսած իր իրավական ձևակերպումներից, այսինքն՝ բուհական հիմնադրամ ասելով ինչ ենք հասկանում, պետական, ոչ պետական ձևաչափն ինչպես պետք է համակցվի:

Լրագրողների հարցին, թե հնարավոր է դրանից հետո որոշ բուհեր փակվեն, նախարարը պատասխանեց. «Բուհական խոշորացում ասելով նկատի ունենք ինստիտուցիոնալ խոշորացում, այսինքն՝ կրճատման խնդիրներ չի կարող լինել: Բայց գոյություն ունի նաև կրթության որակավորումների շրջանակ, կրթական ոլորտներ, իսկ համալսարան կոչվում է այն կրթական հաստատությունը, որը առնվազն երեք կրթական ոլորտներով իրականացնում է ծրագիր, եթե դրանցից մնում է մեկը, կամ երկուսը, դա արդեն խորքային կրթություն է, որտեղ սկսում է ինստիտուային կարգավիճակն աշխատել: Այս տրամաբանությամբ է իրականացվում»:

Կրթության գերատեսչության ղեկավարը շեշտեց, որ նոր օրենքը հնարավորություններ պետք է ստեղծի, որ կարողանան կրթության որակ ակնկալել:

«Եթե հաստատությունը համալսարան է կոչվում, ապա պետք է ունենա ինչ-որ մասնագիտությունների շարք: Եթե օրինակ վերցնենք, որ որևէ համալսարանի ուսանողների թիվը 200 է, դա էլ բաժանենք 6-7 մասնագիտության, դա է բաժանենք չորսի, ստացվում է ուսանողների թվաքանակը ուղղակի հնարավություն չի տալիս այդտեղ որակ ունենալ: Ուրեմն՝ կարող է լինել 200-500 խորացված ուսումնական հաստատություն, բայց լինել արդե ինստիտուտային»,-հավելեց Լ. Մկրտչյանը: