Ձեր վստահելի աղբյուրը

Թուրքիայի ԱԳ նախարար Մևլութ Չավուշօղլուն հերքել է  «Ինջիրլիք» ավիաբազան Ռուսաստանի կողմից օգտագործելու  հնարավորության մասին տարածված լուրերը:

«Անկարան պատրաստ է  համագործակցել Ռուսաստանի հետ՝ «Իսլամական պետություն» ահաբեկչական խմբավորման դեմ պայքարում, սակայն «Ինջիրլիք» ավիաբազայի օգտագործման մասին խոսք չի եղել»,-«Ռիա Նովոստի»-ի հաղորդմամբ, ասել է Թուրքիայի ԱԳ նախարարը:

Ավելի վաղ լրատվամիջոցները հաղորդել էին, իբր Չավուշօղլուն թույլատրել է այդ ավիաբազայում ռուսական ինքնաթիռների մուտքը:

Նշենք, որ «Ինջիրլիք»-ը գտնվում է Թուրքիայի հարավում: Դրա գործունեությունը կարգավորվում է  Անկարայի ու Վաշինգտոնի միջև ստորագրված Ռազմական և տնտեսական համագործակցության մասին պայմանագրով: Ավիաբազայի օգտագործման թույլտվությունը, ըստ այդ փաստաթղթի, տրամադրվում է Թուրքիայի իշխանությունների կողմից:

Այս պահին այնտեղ գտնվում են ԱՄՆ-ի, Գերմանիայի, Մեծ Բրիտանիայի, Կատարի ու Սաուդյան Արաբիայի ինքնաթիռները: Ռուսական ինքնաթիռները, որոնք խոցում են ահաբեկչական խմբավորման թիրախները, տեղակայված են սիրիական Խմեյմիմ ռազմաբազայում: