Ձեր վստահելի աղբյուրը

Այսօր Հավաքական անվտանգության պայմանագիր կազմակերպության համար առաջնահերթություն է  ահաբեկչության դեմ պայքարը, որին անդրադարձել ենք այսօրվա նիստի ժամանակ,- ասաց ՀԱՊԿ գլխավոր քարտուղար Նիկոլայ Բորդյուժան՝ ՀԱՊԿ արտգործնախարարների խորհրդի նիստից հետո մամուլի համար հանդես գալով հայտարարությունով:

«Բացի այդ, լուրջ ուշադրություն է դարձվել միջազգային անվտանգության խնդիրներին՝ հաշվի առնելով այն, որ նման խնդիրներից մեկը լրջորեն ազդում է մեր բոլոր պետությունների անվտանգության, կայունության վրա: Դա  ղարաբաղյան հակամարտության խնդիրն է: Իհարկե, հարցը քննարկվել է նիստի ընթացքում,  ընդունվել է համապատասխան  հայտարարություն»,- նշեց նա:

ՀԱՊԿ գլխավոր քարտուղարի խոսքով, երևանյան նիստը  մի կողմից դիտարկվում է որպես նոր որոշումների ընդունման, մյուս կողմից՝ Հայաստանում հոկտեմբերին ՀԱՊԿ խորհրդի նիստի նախապատրաստական փուլ:

ՀՀ ԱԳ նախարար  Էդվարդ Նալբանդյանի խոսքով, նիստում առաջին հերթին ուշադրության կենտրոնում էր ՀԱՊԿ 2025թ. հավաքական անվտանգության ռազմավարությունը, որը ներկայացվելու է Հավաքական անվտանգության խորհրդի առաջիկա նիստի հաստատմանը:

«Այսօրվա նախարարական խորհրդի նիստը մեզ հնարավորություն ընձեռեց  քննարկելու նախագահների մակարդակով ձեռք բերված պայմանավորվածությունների իրականացման ընթացքը, 2015 թվականի սեպտեմբերին և հոկտեմբերին կայացած Հավաքական անվտանգության խորհրդի որոշումների իրագործումը, ինչպես նաև հայաստանյան նախագահության առաջնահերթությունների իրականացումը»,- ասաց նախարարը։

Է.Նալբանդյանի խոսքով, Հայաստանը մշտապես ակտիվ և նախաձեռնող է եղել կազմակերպության շրջանակներում փոխգործակցության կատարելագործման, միջազգային ասպարեզում նրա դերակատարության ակտիվացման, անդամ երկրների միջև համագործակցության սերտացման, արտաքին քաղաքականության համադրման մեխանիզմների զարգացման առումով։

«Մենք բոլորս համակարծիք էինք, որ կառույցի փոխգործակցության մեխանիզմների կատարելագործումը կախված է առաջին հերթին կազմակերպության անդամ երկրների՝ իրենց անդամակցությունից բխող պարտավորությունների լիակատար իրականացման հետ»,- նշեց ՀՀ ԱԳ նախարարը:

Նա տեղեկացրեց նաև, որ այսօրվա հանդիպմանն անդրադարձ կատարվեց կազմակերպության կանոնադրական մարմինների աշխատանքներին, քննարկվեցին ՀԱՊԿ անդամ երկրների միջև միջազգային տարբեր ձևաչափերում համագործակցության ակտիվացումը, արտերկրում և միջազգային կազմակերպություններում մեր երկրների դիվանագիտական ներկայացուցչությունների ղեկավարներին հավաքական հանձնարարականների պարբերական թարմացումը, 2016-2017 թվականների քաղաքական, պաշտպանական և անվտանգության հարցերով խորհրդակցությունների անցկացման ժամանակացույցը: