Ձեր վստահելի աղբյուրը

Արթիկի հեղեղից անցել է արդեն տաս օր, ստեղծված հանձնաժողովի կողմից վեր են հանվել հեղեղի հետևանքով պատճառված վնասների ծավալներն ամբողջությամբ, սակայն դեռևս անհնար է մինչև վերջ որոշել, թե գումարային իմաստով ինչքան վնաս է հասցվել քաղաքին:  Լրագրողների հետ հանդիպման ժամանակ ասաց Արթիկի քաղաքապետ Արսեն Աբրահամյանը:

Նա նշեց, որ այս պահին սելավատարների մաքրման ուղղությամբ աշխատանքներ են տարվում, սելավի բերած տիղմը, թափոնները հեռացվում են, որից հետո նոր պարզ կլինի վերջնական պատկերը: Քաղաքապետի տեղեկացմամբ, այս պահին քաղաքում աշխատում է երեք էսկավատոր, ութ բեռնատար, մաքրում են քաղաքի հեղեղված փողոցները, այսօր կավարտվի մանկապարտեզի հարակից տարածքի մաքրումը, աշխատանքները կշարունակվե դպրոցի հարակից տարածքի մաքրման ուղղությամբ: Մանկապարտեզի, դպրոցի խցանված կոյուղագծերն  ամբողջությամբ փոխվելու են:

Ա.Աբրահամյանի խոսքով, կառավարության որոշմամբ աջակցություն է ցուցաբերվում և  տուժած բնակչներին, և գումար է հատկացվում հեղեղի հետևանքով խցանված հատվծաների մաքրման համար:

Ըստ նրա, աջակցության են ստանալու  աղետից տուժած 12 բնակարանի բնակիչները, այն անձիք, ովքեր ունեն վնասված բնակմակերես, այն բնակիչները, որոնց ցանքատարածություններն են վնասվել, ունեն կենդանիների կորուստներ:

«Հանձնաժողովի կողմից կատարվել է մանրամասն ուսումնասիրություն: Հատկացված աջակցությունը միանշանակ բավարար է վերականգնելու տները և  բերելու այն վիճակի, որ եղել է մինչ հեղեղը: Հիմնականում 50-60-ական թվականներին կառուցված բնակարաններ են»,- ասաց Արթիկի քաղաքապետը՝ հավելելով, որ աղետի հետևանքների հաղթահարումը ժամանակ է պահանջում:

Միաժամանակ Ա.Աբրահամյանն ընդգծեց, որ որևէ բնակիչ առանց տանիքի չի մնացել, փլուզված բնակարան չկա: Իսկ այն ընտանիքները, որոնց բնակարանները վնասվել են և չեն կարող այդտեղ մնալ մինչև նորոգումը: Քաղաքապետի խոսքով, առաջարկվել է քաղաքի  ցանկացած հատվածում բնակարան վարձել, քաղաքապետարանը վարձակալության հետ կապված հարցերը կլուծի:  Նա նաև ընդգծեց, որ բնակիչների առողջության, անվտանգության հետ կապված որևէ խնդիր չկա, համաճարակի վտանգ էլ չկա:

Խոսելով սելավատարների մասին և պատասխանելով հարցին, թե ինչո՞ւ դրանք մաքրված չեն եղել՝ հաշվի առնելով այն, որ քաղաքապետարանը տարեկան գումար է հատկացնում, Ա.Աբրահամյանն ասաց, որ  հեղեղատարի հունը մաքուր է եղել,  որպես ապացույցներ ունի լուսանկարներ, տեսագրություններ:

«Պատճառը նրանում է, որ տարիների ընթացքում՝ 1930-ական թվականներից, շահագործվել են քարհանքեր, թափոնները լցվել են ձորակները, որոնք քաղաքի վարչական տարածքից դուրս են գտնվում: Տարիների ընթացքում միլիոնավոր խորանարդ մետր ծավալի թափոններ են լցվել այդ ձորակները: Աննախադեպ տեղումները ձորակի լանջերից թափոնները բերել և լցրել են քաղաք: Նույնիսկ, եթե իդեալական մաքուր լինեին սելավատարները, կրկին կլինեին խցանումներ»,- ասաց նա:

Ըստ քաղաքապետի, վերջին քսան տարվա ընթացքում ձորակի հարակից որևէ քարհանք չի շահագործվել:

Պատասխանելով հարցին, թե արդո՞ք որևէ բնապահպան չի զգուշացրել, որ այդ թափոնները վտանգ են ներկայացնում քաղաքի համար, Ա.Աբրահամյանն ասաց, որ որևէ մեկը չէր կարող ենթադրել, որ երբևէ հնարավոր է այդքան լայն լանջ ունեցող ձորակներից թափոնների լվացում լինի: Արդյո՞ք կրկնվելու վտանգ կա հարցին  ի պատասխան քաղաքապետն ասաց, որ կա, քանի որ լանջերի միայն ներքևի մասերն են լվացվել. «Հետագայում, նույնիսկ ոչ այս մասշտաբի տեղումների պարագայում, շատ հնարավոր է, որ նորից լինեն հեղեղումներ»: 

«Անհրաժեշտ է մասնագիտական մոտեցում, գնահատականներ, առաջարկներ»,- ընդգծեց նա:

Միաժամանակ քաղաքապետը նշեց, որ քաղաքի տարածքով անցնող սելավատարները, որոնք 30-40 տարի  շահագործվում են, պետք է վերանորոգվեն, պրոֆիլակտիկ աշխատանքների իրականացման համար անհրաժեշտ է մոտ 350 միլիոն դրամ: Այս աղետից հետո, ըստ Ա.Աբրահամյանի, որոշ հատվածների վիճակն ավելի վատթարացած կլինի: