Ձեր վստահելի աղբյուրը

«Համայնքների խոշորացումը շատ կարևոր ռեֆորմներից շարքից  է համարվում Հայաստանի համար»,-այսօր լրագրողների հետ հանդիպմանն ասաց ԱԺ պատգամավոր Ստեփան Մարգարյանը:

«Այն, ինչ որ հիմա արվում է, իմ կարծիքով, իհարկե, այն չի ինչ-որ վերջնական պետք է լիներ. սա արվում է մի քայլ առաջ գնալու՝ եղած իրավիճակից: Մենք տեղական ինքնակառավարում, ըստ էության, շատ համայնքներում չունենք, քանի որ քիչ թվաքանակով ազգաբնակչություն ունեցող գյուղերում՝ ասենք հարյուր բնակչություն ունեցող գյուղում, տեղական ինքնակառավարում ասածը վերապահում է պահանջում, պարզ է, որ այդ ինստիտուտն այնտեղ չի աշխատի»,-նշեց Մարգարյանը:

Ըստ նրա՝ հիմա ունենք գյուղեր, որոնք սեփական բյուջե հավաքում են ընդամենը մի քանի հարյուր հազար դրամ և ստանում են համահարթեցման գծով դոտացիա՝ 3,5 մլն դրամ և սա բավարարում է միայն տեղական իշխանության աշխատավարձը և ծառայություն մատուցելու համար որևէ գումար չի մնում, իսկ խոշորացումը բերում է նրան, որ ամեն մեկի փոքր ունեցածը միավորվում է և համատեղ ինչ-որ հարց հնարավոր է լուծել կամ որևէ ծառայություն մատուցել:

«Օրինակ շատ գյուղերում աղբահանություն չի կատարվում, քանի որ չունեն այդ հնարավորությունը, եթե միավորվեն մի քանի գյուղեր, նրանք կկարողանան մեքենա ձեռք բերել և կարողանան մի քանի հոգու աշխատավարձ ապահովել, որով հնարավոր կլինի իրականացնել այդ ծառայությունը: Եվ այդպես գուցե ամեն տարի մի գործ անեն ճանապարհների հետ կապված, փողոցային լուսավորության հետ կապված: Սրան գումարած խոշորացման պարագայում այն դոնորները, ովքեր ներգրավված են այս գործի մեջ, խոշորացման դեպքում որոշակի դրամաշնորհներ են ներկայացնում այդ գյուղերին, ինչը որպես ստարտային գումար շատ կարևոր է»,-նկատեց ԱԺ պատգամավորը:

Ըստ նրա Հայաստանում տարածքների զարգացում չկա. «Հայաստանում տարածքներն ընդհանրապես չեն զարգանում, բազմաթիվ տարածաշրջաններում ոչինչ չի կատարվում, տարեցտարի ոչինչ չի փոխվում: Անհրաժեշտ է տարածքների զարգացման շատ իրատեսական ծրագիր, դրանց տակ գումարներ լինեն և այդ դեպքում խոշորացումը արդյունք կտա»:

Ինչ վերաբերում է համայնքների բնակիչների արձագանքներին, պատգամավորն ասաց, որ մինչև հիմա էլ նամանկներ է  ստանում համայնքներից տարբեր մտահոգություններով:

«Մեղմ ասած ճիշտ չի, երբ ասում են համայնքների խոշորացումով ավելի է վատանալու վիճակը, գյուղերը դատարկվելու են: Իսկ այն, որ ասում են խոշորացումով դպրոցներ կփակվեն, դա այդպես չէ, քանի որ դպրոցներ միավորվել փակվելու ծրագիրը կապ չունի համայնքների խոշորացման ծրագրի հետ»:

Լրագրողների հարցին, թե արդյոք բնակիչներին խնդրի առաջ չեն կանգնեցոնում, երբ մի թղթի համար ստիպված են լինելու կիլոմետրեր անցեն, Ստեփան Մարգարյանը դա էմոցիոնալ դաշտից համարեց՝ նշելով, որ հիմա առաջվա պես ամեն բանի համար տեղեկանք չեն ուզում: