Ձեր վստահելի աղբյուրը

Մոսկվայի հետ հարաբերությունները կարգավորելու Անկարայի ցանկությունը պայմանավորված չէ միայն երկիր ռուս զբոսաշրջիկներին վերադարձնելու մղումով, այլ հետապնդում է հեռու գնացող նպատակներ: «Svpressa.ru»-ի փոխանցմամբ` այս մասին գրում է ամերիկյան «Foreign Policy»  հանդեսը:

Ըստ հեղինակի` Անկարան առաջին հերթին փորձում է ձերբազատվել էներգակիրների կախվածությունից:

Երկիրը ստիպված է գազ ձեռք բերել Ռուասատանից, Իսրայելից և Իրանից և, փչացնելով այս երկրների հետ հարաբերությունները, Թուրքիան պարզապես կարող է կանգնել վառելանյութի սղությաՆ վտանգի առջև:

Բացի դրանից, ըստ «Foreign Policy»-ի, պատժամիջոցների չեղարկումից հետ Իրանը մտադիր է արժանի տեղ զբաղեցնել միջազգային շուկայում և տարածաշրջանում նվազեցնել Սաուդյան Արաբիայի ազդեցությունը: Այս համատեքստում՝ եթե Թուրքիան չի վերականգնում Ռուսաստանի հետ հարաբերությունները, ապա ստացվում է, որ Թեհրանի նկրտումները կյանքի են կոչվում Անկարայի միջոցներով:

Ռուսաստանի հետ հարաբերությունների կարգավորման մյուս կարևոր շարժառիթը, ըստ պարբերականի, ահաբեկչության դեմ պայքարն է: Անկարան, մասնավորապես ձգտում էր վերափոխել Մերձավոր Արևելքը, և այդ նպատակին հասնելու համար չէր խորշում անգամ «Իսլամական պետության» զինյալների  հետ բաց առևտրից: Սակայն Եվրոպայի և ԱՄՆ փորձը վկայում է այն մասին, որ մոլի  ծայրահեղականների հետ դաշնակցությունը վերջարդյունքում կարող է շատ թանկ արժենալ:  

Եվ, ըստ աղբյուրի, բոլորովին պատահական չէ, թուրքական քաղաքներում սկսեցին պայթյուններ հնչել: Պատերազմը փաստացի տեղափոխվեց Թուրքիայի տարածք:

Բացի դրանից, Անկարայում ՌԴ-ի հետ հարաբերությունների կարգավորման մասին սկսեցին խոսել այն մասին, երբ պարզ դարձավ, որ Արևմուտքը ամենևին մտադիր չէ բավարարել Թուրքիայի պահանջները: ԱՄՆ-ը բացեիբաց սատարում է Սիրիայի քրդերին, իսկ ԵՄ դեռևս չի ցանկանում բացել իր սահմանները Թուրքիայի քաղաքացիների համար:

Այդուամենայնիվ, ըստ «Foreign Policy»-ի, հիմնական խնդիրը Թուրքիայի նախագահ Ռեջեփ Թայիփ Էրդողանի` որպես գործընկեր «հուսալիությունն» է և ոչ ոք չի կարող վստահ լինել, որ վաղը Էրդողանը չի իրագործի հերթական սադրանքը:

Ներկա պահին, ըստ պարբերականի, Թուրքիան գտնվում է մեկուսացման մեջ, թուլացել է և այդ իսկ պատճառով պատրաստ է երկխոսության:

Ռուսաստանյան «Մերձավոր Արևելք-Կովկաս» հետազոտական կենտրոնի փորձագետ Ստանիսլավ Տարասովի կարծիքով` Թուրքիան այլևս չի կարող ՌԴ-ի հետ իր հարաբերությունները կառուցել «Քաղաքականությունն` առանձին, տնտեսությունն`առանձին սկզբունքով» , այն պարզ պատճով , որ փոփոխվել է աշխարհաքաղաքական ֆոնը:

«Էրդողանը պաշտոնապես ճանաչել է երկրի նախկին արտգործնախարար Ահմեդ Դավութօղլուի կողմից երկար տարիներ վարվող արտաքին քաղաքականության տապալումը: Նա հանդես եկավ նեոօսմանիզմի նոր հայեցակարգով, սակայն գործնականում երկիրը տարավ դեպի միջազգային մեկուսացում: Ստացվեց, որ երկիրը ունի շատ թշնամիներ և չունի ընկերներ»,- նշել է Ստանիսլավ Տարասովը:

Պատասխանելով այն հարցին թե կարելի՞ է արդոք վստահել Էրդողանին, Ստանիսլավ Տարասովը շեշտել է, որ ռուսական կողմը ունի թուրքական, կամ «նենգ դիվանագիտության» հետ շփման բազմադարյա փորձ, և առկա իրավիճակում կարող է լուծել իր ռազմավարական խնդիրները:

Իր հերթին Ռուսաստանյան ռազմավարական հետազոտությունների ինստիտուտի Ասիայի և Մերձավոր արևելքի կենտրոնի ղեկավար Աննա Գլազևայի կարծիքով` Էրդողանը գիտակցել է իր կողմից որդեգրած արտաքին քաղաքականության լիակատար տապալումը:

Բացի դրանից, ըստ փորձագետի, ահաբեկչական վտանգի տեսանկյունից երկիրը գտնվում է աղետալի վիճակում:

«Ռուսաստանի նկատմամբ Թուրքիայի գործողությունները հստակ կերպով ցույց տվեցին թուրքական ղեկավարության իրական դեմքը: Պետք չէ հավատալ քաղաքական գործիչներին, իսկ հարաբերությունները պետք է կառուցել պրագմատիզմի և պայմանագրային հիմքի վրա: Ատոմակայանի և «Թուրքական հոսքի» շինարարության վերականգնման հարցում, հուսով եմ, մեր կառավարությունը ոչ թե ականջալուր կլինի էներգետիկ ընկերությունների լոբբիստներին, այլ կմտածի նախագծերի նպատակահարմարության մասին»,- նշել է  Աննա Գլազևան` հավելելով, որ, հանձինս Ուկրաինայի, ձգտելով ձերբազատվել ոչ հուսալի տարանցիկ երկրից, Ռուսաստանը կստանա նույնքան ոչ հուսալի գործընկեր` հանձինս Թուրքիայի: