Ձեր վստահելի աղբյուրը

Մեկնարկել է «Ավրորա» մարդասիրական մրցանակի 2017 թ․ թեկնածուների առաջադրումը: Յուրաքանչյուր ոք կարող է առաջադրել թեկնածուի, որը հաղթահարել է մարտահրավերներ՝ բացառիկ ազդեցություն գործելով մարդկային կյանքի փրկության և մարդասիրական հիմնախնդիրների առաջխաղացման վրա։

«Ավրորա» մրցանակի կազմակերպիչները նաև sms հաղորդագրությունների միջոցով են տեղեկացնում հանրությանը, որ կարող են առաջադրել թեկնածուներ, ովքեր կարող են դառնալ 2017-ի դափնեկիրը: Առաջադրումներ կարելի է կատարել մինչև  սեպտեմբերի 9-ը՝ www.auroraprize.com կայքի միջոցով:

«Ավրորա» մարդասիրական մրցանակի դափնեկրին տրվում է 100,000 ԱՄՆ դոլարի պարգև և նրան ոգեշնչած բարեգործական կազմակերպություններին 1,000,000 ԱՄՆ դոլարի դրամաշնորհի ներկայացնելու հնարավորություն։ 

«Ավրորա» մրցանակը նպատակ ունի ճանաչման արժանացնելու  նրանց, որոնք վտանգի են ենթարկում սեփական կյանքը, առողջությունը, ազատությունը, որպեսզի փրկեն և օգնություն ցուցաբերեն այն մարդկանց, որոնք տառապում են մերօրյա ողբերգությունների, հատկապես՝ մարդածին աղետների ու մարդկայնության դեմ իրականացվող հանցագործությունների հետեւանքով։

«Ավրորա» հիմնել են 100 LIVES նախաձեռնության հիմնադիրները:  «Ավրորա» մրցանակը շնորհվում է Հայոց ցեղասպանությունը վերապրածների անունից` ի երախտագիտություն նրանց փրկողների:

Այս տարվա ապրիլին «Ավրորա» մրցանակի առաջին դափնեկիրը դարձել է Բուրունդիի «Խաղաղության Տան» հիմնադիր Մարգարիտ ‏Բարանկիցեն։ Նա Բուրունդիի քաղաքացիական պատերազմի տարիներին փրկել և խնամել է 30,000 երեխաների, որբերի ու փախստականների։

«Ավրորա» համաշխարհային մարդասիրական ամենամյա երկրորդ մրցանակը կշնորհվի 2017 թվականի ապրիլի 24-ին Երևանում։