Ձեր վստահելի աղբյուրը

Դեբեդ գետի ափամերձ տարածքներում գործող քարի արտադրամասերի  թափոնները լցվում են գետը, ինչը կարող է պատճառ դառնալ ավելի լրջագույն աղետի: Այս մասին Լոռու մարզպետարանում անցկացրած խորհրդակցության ժամանակ ասել է Լոռու մարզպետ Արթուր Նալբանդյանը:

Հիշեցնենք, որ մարզում սելավների հետևանքով լրջորեն վնասվել են մի քանի գյուղերի ճանապարհներ:

Քաղաքաշինության վարչության ճանապարհաշինության և տրանսպորտի բաժնի պետ Վարդան Գևորգյանըի խոսքով, դրանցից  Անտառաշեն, Անտառամուտ, Եղեգնուտ, Դեբեդ, Սարչապետ, Անտառամուտ և Շահումյան համայնքների ղեկավարների ջանքերով սելավների հետևանքով լրջորեն տուժած ներհամայնքային ճանապարհները որոշակիորեն բարեկարգվել են: Որոշ համայնքներում եղել են նաև Տարածքային կառավարման և զարգացման նախարարության աշխատակիցները: Բոլոր համայնքներում վնասի չափերն արձանագրվել են և ներկայացվել ՀՀ կառավարությանը:

«Մենք հստակ գիտակցում ենք, որ նման աղետի հիմնական պատճառներից մեկը սելավատարները ժամանակին չմաքրելն է: Դրա վերաբերյալ յուրաքանչյուր տարի շրջաբերականներ ենք ուղարկում համայնքներին, սակայն՝ անարդյունք: Պատճառներից մեկն էլ ապօրինի շինություններն են սելավատարների վրա»,-ասել է Լոռու մարզպետը:

Նա ընդգծել է, որ Լոռու մարզի մի քանի համայնքներ գտնվում են հանրապետության ամենահորդառատ գետերից մեկի՝ Դեբեդի ափամերձ հատվածներում:

«Գաղտիք չէ, որ գետի ափամերձ տարածքներում գործող քարի արտադրամասերի  թափոնները լցվում են գետը, ինչը կարող է պատճառ դառնալ ավելի լրջագույն աղետի», -նշել է մարզի ղեկավարը՝ խստորեն հանձնարարելով կանխարգելիչ միջոցառումներ իրականացնել, բացատրական աշխատանքներ տանել՝ թե՛ համայնքների ղեկավարների և թե՛ նշված քարի արտադրամասերի տնօրենների հետ: