Ձեր վստահելի աղբյուրը

«Այն քաղաքական ուժերը, որոնք ՕԵԿ-ին համարում են ընդդիմադիր կուսակցություն, ինձ համար ընդդիմադիր չեն»,- «Ուրվագիծ» հաղորդաշարին տված հարցազրույցում Նիկոլ Փաշինյանը այսպես է արձագանքել Լևոն Զուրաբյանի հայտարարությանը, թե ընդդիմադիր կուսակցություններին քննադատողը ջուր է լցնում իշխանության ջրաղացին:

Նա մեծ սենսանցիան է համարել, որ «Օրինաց երկիր»-ը Հայ ազգային կոնգրեսի համար դարձել է ընդդիմություն, հիշեցնելով, որ 2008-ին այդ կուսակցությունը ՀԱԿ-ի համար ախք էր, ծախու էր, կամ ներդրված ական:

Անդրադառնալով քաղաքական դաշտի խճանկարին, Փաշինյանը պնդել է, որ մարդիկ ուզում են քաղաքական դաշտում տեսնել մեկ ընդդիմություն, որպեսզի ընտրությունների ժամանակ հնարավորություն ունենան ընտրելու իշխանության և ընդդիմության միջև, և ոչ թե՝ նախ ընդդիմության ու ընդդիմության, ապա միայն՝ ընդդիմության և իշխանության միջև:

Փաշինյանը անկախ Հայաստանի քաղաքական շարժումների էքսկուրսի հիման վրա եզրակացրել է, որ մեզանում ընդդիմադիր դաշինքները միշտ խայտառակ կերպով ձախողվել են՝ չկարողանալով մինչև վերջ սպասարկել իրենց առաջադրած քաղաքական խնդիրը, ուստի նրա համար ակնհայտ է, որ այսուհետ էլ օրինաչափորեն նման նախընտրական դաշինքները հաջողություն չեն ունենալու:

Փաշինյանը նաև ասել է, չի պատրաստվում միանալ այն կուսակցություններին, որոնք 2008-ին դե յուրե և 2013-ին դե ֆակտո պաշտպանել են Սերժ Սարգսյանի թեկնածությունը: Նա չի պատրաստվում մոռանալ, որ 2008-ին ՕԵԿ-ը «ընդդիմադիր հռետորաբանությամբ շահել է ընդդիմադիր զանգվածի ձայները և քաղաքական դավաճանության գնալով, դրանք դրել է Սերժ Սարգսյանի ոտքերի տակ», ինչպես նաև «2008-ի մարտի մեկին խաղաղ ցուցարարների նկատմամբ մահվան դատավճիռ արձակած» Վարդան Օսկանյանին:

Ըստ Փաշինյանի, խնդիրը լուծելու համար Քաղաքացիական պայմանագիր կուսակցությունը առաջ է քաշում «մեկ ընդդիմություն» գաղափարը (բայց ոչ թե միակ ընդդիմության), ինչը նշանակում է ունիտար ինստիտուցիոնալ քաղաքական կուսակցություն, որը հանրային գիտակցության մեջ ընկալվում է իբրև ընդդիմություն՝ ունակ ստանալու ժողովրդի ձայները, դրանք պահելուն և ստացած ձայների համապատասխան քաղաքական արդյունք արձանագրելու:

«Մենք աշխատելու ենք այս ուղղությամբ, քանի որ մյուս ճանապարհները արդյունքի չեն բերելու», - ասել է նա: