Ձեր վստահելի աղբյուրը

«Նախկին ազատամարտիկները պատրաստ են մեկնել Թալիշ գյուղի հարակից տարածք, այնտեղ գյուղի կողքին ավան կառուցել և մշտական բնակություն հաստատել»,-այսօր լրագրողների հետ հանդիպմանը հայտարարեց «Թալիշ» հիմնադրամի հոգաբարձուների խորհրդի նախագահ Մելիտա Խալափյանը:

Նրա խոսքով՝ այսօր Թալիշը սահմանային գոտուց վերածվել է չեզոք գոտու և չեն կարող թալիշցիներին ուղղել Թալիշ. «Քանի դեռ պահպանվում է այս ոչ պատերազմ, ոչ խաղաղությունը վիճակը, մենք ունենք մի ծրագիր, որը միտված է պահպանել այդ տարածքը: Մեր խնդիրն այսօր պաշտպանության երկրորդ գիծ ունենալն է: Մենք ցանկանում են ստեղծել ավան, բնակեցնել այդ տարածքը հզոր կամքի տեր մարդկանցով, ովքեր պատրաստ են կանգնել երկրորդ պաշտպանական գծում, ովքեր կօգնեն առաջին գծում կանգնած հերոս երեխաներին»:

Մելիտա Խալափյանը տեղեկացրեց, որ իրենք կոչով դիմել են ամբողջ աշխարհի հայությանը և նամակ են ուղարկել  ՀՀ և ԼՂՀ կառավարությանը՝ օգնելու և թույլ տալու իրենց ծրագիրը կյանքի կոչել:

«Թալիշի սահմանների պաշտպանության ամրապնդումը, գյուղի վերականգնումը և բնակչության վերադարձը» ծրագրի հեղինակ, «Թալիշ» հիմնադրամի հոգաբարձուների խորհրդի անդամ, ՀՀ և ԼՂՀ հույների «Պատրիդա» կազմակերպության նախագահ, ՀՀ հանրային խորհրդի անդամ Էդուարդ Պոլատովն էլ նշեց, որ իրենց հիմնական նպատակը առաջնագծի թիկունքն ուժեղացնելն է. «Թալիշը փոքրիկ գյուղ է և եթե մի փոքրիկ ավան էլ դնենք կողքը, ավելի ապահով կլինի: Մենք ցանկանում ենք գործ դնել, ապրել։ Մեզ ցանկանում են միանալ պատրեազմ ապրած ազատամարտիկները»:

Պոլատովը հայտնեց, որ ՀՀ և ԼՂՀ կառավարություններին ուղարկած դիմումից մոտ մեկ ամիս է անցել, դեռևս պատասխան չեն ստացել. «Հիմա մենք ուզում ենք հասկանալ,  իշխանավորները մեզ հետ համագործակցելո՞ւ են, թե՞ խանգարելու»։

Լրագրողները հետաքրքրվեցին, թե թույլ չտալու դեպքում ինչ են պատրաստվում անել, նա պատասխանեց, որ իրենց չեն կարող արգելել գնալ, միևնույն է գնալու են և իրենց հավաքած գումարով իրականացնեն իրենց ծրագիրը:

«Մենք կարող ենք մեր փողով հողամաս առնենք ու գնանք ապրելու, բայց մեզ պետք է, որ մեր սիրելի իշխանությունները մեզ աջակցեն:

«Հայաստան» հիմնադրամի միջոցով Լոս Անջելեսից 1 մլն 800 հազար դոլար է հավաքվել ծրագրի համար»,-ասաց նա:

Բանախոսները հավելեցին, որ արդեն գրեթե  300 հոգի ցանկություն են հայտնել միանալ իրենց ծրագրին: