Ձեր վստահելի աղբյուրը

ՀՀ Կենտրոնական բանկը չինական յուանով ներդրումների հնարավորությունները, առկա ռիսկերն ու խնդիրներն ուսումնասիրելու նպատակով հուլիսի 7-8 ՀՀ ԿԲ Դիլիջանի ուսումնահետազոտական կենտրոնում կազմակերպել է կենտրոնական բանկերի համաժողով` «Չինական յուանով ներդրումների հեռանկարները» թեմայով:

Ինչպես տեղեկացնում են ՀՀ կենտրոնական բանկի հասարակայնության հետ կապերի ծառայությունից,  Համաժողովին քննարկվել են Չինաստանի տնտեսությանը, ֆինանսական շուկայի կառուցվածքին ու առանձնահատկություններին, բարձր վարկանիշով ֆինանսական գործիքներում ներդրումների հնարավորություններին և դրանցում ներդրումների իրականացման հետ կապված խնդիրներին ու ռիսկերին առնչվող հարցեր: 

2015 թ. նոյեմբերի 30-ին Արժույթի Միջազգային Հիմնադրամի (ԱՄՀ) խորհրդի նիստին որոշվել է չինական յուանը 2016 թ. հոկտեմբերի 1-ից ներառել Փոխառության Հատուկ Իրավունքի (ՓՀԻ) արժութային զամբյուղի մեջ: Միջազգային առևտրում չինական յուանի դերի շարունակական աճը, Չինաստանի Ազգային Բանկի կողմից օտարերկրյա ներդրողների համար յուանի շուկա մուտք գործելու սահմանափակումների մեղմացումը, ինչպես նաև ԱՄՀ կողմից ՓՀԻ զամբյուղի մեջ չինական յուանի ներառումը շարժառիթ են հանդիսացել աշխարհի մի շարք երկրների կենտրոնական բանկերի կողմից չինական յուանով ներդրումների հնարավորություններն ուսումնասիրելու և այդ շուկա մուտք գործելու համար:

Նշվում է, որ համաժողովը կազմակերպվել է Միջազգային հաշվարկների բանկի (BIS) աջակցությամբ, որի ընթացքում իրենց փորձն են ներկայացրել Amundi Asset Management, BIS, Clearstream քլիրինգային կազմակերպության, HSBC, Bank of China և People’s Bank of China առաջատար մասնագետները: Համաժողովին մասնակցել են ՀՀ կենտրոնական բանկի, ինչպես նաև Ալբանիայի, Ավստրիայի, Ռուսաստանի, Սլովակիայի, Լեհաստանի, Բելոռուսի, Չեխիայի, Չինաստանի, Լեբանանի, Հնդկաստանի, Ղրղզստանի, Ինդոնեզիայի կենտրոնական բանկերի, ԱՄՀ ու Եվրոպական Վերակառուցման և Զարգացման  Բանկի ներկայացուցիչները: