Ձեր վստահելի աղբյուրը

Մտահոգություններ կան, որ հայաստանյան շուկա օրեր առաջ մուտք գործած «Yandex Taxi» ծառայությունը դեմպինգ է իրականացնում: Ծառայությունից օգտված սպառողները ցածր գներից գոհ են, բայց միաժամանակ ահազանգում են, որ տնտեսվարողը շուկայում եղածներին դուրս մղելու քաղաքականություն է իրականացնում, ինչից հետո ցույց կտա իրական դեմքը:
Տաքսի պատվիրած ու ծառայությունից օգտված քաղաքացիները նշում են, որ մինիմալ գինը, իսկապես, 100 դրամ է: Լրագրող Արշալույս Մղդեսյանը գրել էր  վարորդը պատմածը, ամեն պատվերից 400 դրամ է ստանում:

Արձագանքելով գործընկերոջ գրածին, տնտեսագետ, տնտեսական լրագրող Բաբկեն Թունյանը նշել էր. «Եթե վարորդը ճիշտ է ասել, ուրեմն էս ընկերությունը ամեն պատվերից զգալի վնաս է կրում։ Ինչի՞ համար։ Որ շուկան գրավի։ Իսկ սա դասական դեմպինգ է, որն արգելված է։ Նոր ընկերության մուտքը վատ բան չի, բայց եթե արդար են խաղում»:

Նրանք երկուսն էլ հույս են հայտնել, որ խնդրին կմիջամտի Արտակ Շաբոյանի ղեկավարած Տնտեսական մրցակցության պաշտպանության պետական հանձնաժողովը: Հանձնաժողովի մամուլի քարտուղար Գայանե Սահակյանը Panorama.am-ին ասաց, որ այս պահին իրենք չեն պատրաստվում ուսումնասիրություն անցկացնել, քանի որ դրա համար հիմքերը չկան:

«Նախ այդ տաքսի ծառայությունը 2-3 օր է այստեղ աշխատում, ի՞նչ դեմպինգի մասին  կարող է հիմա  խոսք լինել, երրորդը՝ հանձնաժողովը ոչ մի դիմում չի ստացել, չորրորդը՝ հանձնաժողովը տաքսիների ոլորտում ընդհանրապես լիազոր մարմին չէ, էկոնոմիկայի նախարարությունն է զբաղվում տաքսիների լիցենզավորմամբ և մնացած բոլոր խնդիրներով»,-նշեց  Գ. Սահակյանը:

Հանձնաժողովի մամուլի քարտուղարի խոսքով, եթե որևէ տնտեսվարող, հասարակական կազմակերպություն կդիմի հանձնաժողովին ու փաստեր կներկայցնի, որ իր գործունեությանը խոչընդոտում են, դեմպինգ է  իրականացվում, ապա հանձնաժողովը կսկսի ուսումնասիրություն իրականացնել:

«Դեմպինգ ասվածը շատ լայն հասկացություն է: Այնպես չէ, որ մեկն աշխատում է մինիմալը 600 դրամով, մյուսը՝ 500 դրամով, դա նշանակում է դեմպինգ: Տաքսիների շուկան բավականին մրցակցային է Հայաստանում: Այդ շուկայում կան հարյուրավոր տնտեսվարողներ, եթե մեկը մյուսից 50 դրամով էժան է ծառայություն մատուցում, չի կարելի պնդել որ դեմպինգ է իրականացվում»,-ասաց նա:

Սահակյանն ասաց, եթե կլինի որևէ մեկը,  ով կապացուցի, որ 600 դրամից ցածր գինը անխոհեմ է, ապա հանձնաժողովը կսկի ուսումնասիրել շուկան:

«Պաշտոնապես ասում եմ, որ հանձնաժողովը մրցակցային օրենսդրության խախտման վերաբերյալ որևէ փաստ, որևէ դիմում բողոք, որևէ ահազանգ որևէ մեկից չի ստացել»,-ասաց հանձնաժողովի ներկայացուցիչը:

Ինչ վերաբերում է  սեփական նախաձեռնությամբ ուսումնասիրություն սկսելուն, ապա Գ. Սահակայնը նշեց, որ դա արվում է  այն դեպքերում, երբ շուկայում կան գերիշխող դիրք ունեցող տնտեսվարողներ: