Ձեր վստահելի աղբյուրը

Հայազգի գործարար, խարդախության համար դատապարտված Լևոն Հայրապետյանը գտնվում է «Մատրոսկայա տիշինա» բանտի բուժկետում և նրա առողջական վիճակը բավականին ծանր է: Այդ մասին այսօր լրագրողների հետ հանդիպմանը հայտարարեց Հայրապետյանի աջակցության համար ստեղծված նախաձեռնող խմբի անդամ, իրավաբան Հայկազ Մակարյանը:

Նա փոխանցեց, որ Հայրապետյանը, որը ժամանակին Արցախին մեծ ֆինանսական օգնություն է ցուցաբերել, ունի հիվանդությունների փունջ՝ նորագոյացություններ, շաքարային դիաբետ, տարել է ինֆարկտ, մի քանի ինսուլտ:

Իրավաբանը ասաց, որ ՌԴ քրեակատարողական իրավունքի, և ընդհանրապես քրեական իրավունքի մի քանի հոդվածներով հստակ սահմանվում է այն հիվանդությունների ցանկը, որոնց դեպքում անձին ազատազրկում չի կարելի, և Հայրապետյանի հիվանդություններն այդ ցանկում կան:

«Բանտային պայմանները հակացուցված են նման հիվանդությունների համար», -ասաց իրավաբանը:

Նրա փոխանցմամբ, «Բուտիրկա» բանտում պայմանները «անմարդկային» են եղել. քնել են հերթափոխով, կիսատանջված վիճակում բերել են դատարան շղթայակապ ու տարել: Այդ ամենը, ըստ բանախոսի, Մարդու իրավունքների եվրոպական կոնվենցիայի 6-րդ հոդվածի խախտում է՝ «արդար դատաքննության իրավունք»:

Ներկայացնելով քրեական գործի բնույթը, Մակարյանն ասաց, որ յուրացման և շորթման մեղադրանքները Հայրապետյանի նկատմամբ, վերացվել են և այժմ միայն խարդախության համար է գործարարը մեղադրվում:

«Իբրև թե նախկին պաշտոնյա, նահանգապետ Իգոր Իզմեստևի մայրիկից վերցրել է 700 հազար ԱՄն դոլար տղային բանտից հանելու համար ու չի արել: Լևոն Հայրապետյանը, սակայն, բացարձակապես հերքում է և դրա համար ունի հստակ ապացույցներ», -հայտարարեց իրավաբանը:

Նա կարծում է, որ Լևոն Հայրապետյանի վերաբերյալ հարցը պետք է ընդգրկել Հայաստանի ազգային ժողովի օրակարգ. «Ամեն մի պատեհ ու անպատեհ առիթով գրողի տարած հարցեր մտցնում են Ազգային ժողովի օրակարգ, կներեք, մի՞թե մարդու մասին չէ խոսքը, այն մարդու, որին մեծագույն համակրանքով է վերաբերվել ԱՄՆ նախագահը, արքայազն Չարլզը: Պետք է պատգամավորները քննեն հարցը և համապատասխան ստորագրությամբ հայտարարություն ուղարկեն ՌԴ Պետդումայի նախագահ Սերգեյ Նարիշկինին ու պահանջեն պետական մակարդակով այս հարցին լուծում տան»:

Մակարյանը տեղեկացրեց, որ իրենց նախաձեռնությունը վերսկսելու է Երևանում ի պաշտպանություն Հայրապետյանի կազմակերպող բողոքի ակցիաները:

«Ցույցերը պետք է վերսկսել, ես նույնիսկ պատրաստ եմ մինչև ՌԴ դեսպանատան դիմաց նստացույց անցկացնելուն: Նստացույցը լինելու է այն պահանջով, որ սթափվեն», -հայտարարեց Մակարյանը:

Նա նաև տեղեկացրեց, որ բողոքի ակցիաները չեն դադարի  այնքան ժամանակ, մինչ Լևոն Հայրապետյանը վայրէջք չկատարի «Զվարթնոց» օդանավակայանում և մարդիկ նրան չընդունեն որպես յուրային: