Նալբանդյան. Ադրբեջանը փորձում է անտեսել ձեռք բերված համաձայնությունները

Քաղաքական 11:09 12/07/2016

Նալբանդյան. Ադրբեջանը փորձում է անտեսել ձեռք բերված համաձայնությունները

Բանակցային գործընթացը շարունակելու համար պայմաններ ստեղծելու նպատակով, նախևառաջ, անհրաժեշտ է իրականացնել այն, ինչի մասին հատուկ շեշտվել է, և ինչի շուրջ պայմանավորվածություններ են ձեռք բերվել գագաթաժողովներին: Այս մասին հայտարարել է ԱԳ նախարար Էրդվարդ Նալբանդյանը՝ ելույթ ունենալով Կիևում անցկացվող Արևելյան գործընկերության արտգործնախարարների ոչ պաշտոնական հանդիպմանը:

«Հակամարտության բացառապես խաղաղ կարգավորում, զինադադարի վերաբերյալ 1994-1995թթ. եռակողմ անժամկետ համաձայնագրերի անվերապահ իրականացում, միջադեպերի հետաքննության մեխանիզմի ստեղծում, ԵԱՀԿ գործող նախագահի անձնական ներկայացուցչի թիմի ընդլայնում»,-պայմանավորվածությունները թվարկել է ԱԳ նախարարը:

Նա նշել է, որ Վիեննայի և Սանկտ Պետերբուրգի գագաթաժողովները, առաջին հերթին, նպատակ ունեին կայունացնելու ապրիլին Ադրբեջանի կողմից Լեռնային Ղարաբաղի դեմ սանձազերծված, միջազգային մարդասիրական և մարդու իրավունքների կոպիտ խախտումներով ուղեկցված լայնամասշտաբ ագրեսիվ գործողությունների հետևանքով հակամարտության գոտում ստեղծված իրավիճակը:

«Ցավոք, երկու գագաթաժողովներից հետո Ադրբեջանը փորձում է անտեսել ձեռք բերված համաձայնությունները՝ խոչընդոտելով խաղաղ գործընթացի առաջխաղացումը: Հայաստանը եռանախագահների հետ միասին շարունակելու է ջանքերն՝ ուղղված Լեռնային Ղարաբաղի հիմնախնդրի բացառապես խաղաղ կարգավորմանը»,-ասել է նա:

Նալբանդյանն առաջարկել է Երևանում հյուրընկալել Արևելյան գործընկերության ոչ պաշտոնական հաջորդ հանդիպումը:

«Այս առումով մենք հույս ենք հայտնում երևանյան հանդիպման միջոցով բովանդակալից ներդրում ունենալ մեր համագործակցությանը»,-նշել է նա:

Նալբանդյանի ելույթն ամբողջությամբ կարող եք կարդալ այստեղ:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: