Ձեր վստահելի աղբյուրը

Պետական ծառայողների համար նախատեսված սոցիալական փաթեթի կասեցումը վերաբերում է 2017-2019թթ. միջնաժամկետ ծախսային ծրագրում սոցիալական փաթեթի հանգստի ապահովման ծառայության բաղադրիչի ներառմանը: Այս մասին այսօր լրագրողների հետ հանդիպման ժամանակ ասաց  ՀՀ էկոնոմիկայի նախարարության զբոսաշրջության  զարգացման քաղաքականության վարչության պետ Մեխակ Ապրեսյանը՝ հավելելով, որ մինչև այս տարվա դեկտեմբերի 20-ը պետական ծառայողները կարող են օգտվել հանգստի բաղադրիչից:

Մեխակ Ապրեսյանը նշեց, որ ոլորտում իսկապես կան չարաշահումներ և վարչապետ Հովիկ Աբրահամյանի հայտարարած չարաշահումների արդյունքում մի շարք գործեր արդեն քննվում են:

Վարչության պետը նաև հայտնեց, որ հանգստի բաղադրիչի կասեցմանը նախորդել են տուրօպերատորների գործունեության դադարեցումը: «Մեկ տուրօպերատոր հանվել է ցանկից, 2-ի հրամանն արդեն ստորագրվել է, իսկ մյուս տուրօպերատորներին տրվել է նախազգուշացում»,- ասաց նա:

Մեխակ Ապրեսյանը նշեց, որ կան հանձնարարականներ, շահագրգիռ կողմերը՝    էկոնոմիկայի, ֆինանսների, աշխատանքի ու սոցիալական հարցերի նախարարություններն  ուսումնասիրություններ են իրականացնում, որպեսզի համապատասխան առաջարկություններ մշակեն սոցիալական փաթեթներում հնարավոր չարաշահումները բացառելու համար: Ուստի, էկոնոմիկայի նախարարության պաշտոնյան  չբացառեց, որ 2017թ-ի պետական բյուջեում նորից ներառվի հանգստի բաղադրիչը:

«Ի վերջո պետք է հաշվի առնել, որ սոցփաթեթների ներդրումն ընդամենը 3-4 տարվա պատմություն ունի, իսկ դա իրենից ենթադրում է, որ  ընթացքում կլինեն խնդիրներ, որոնց պետք է լուծումներ տալ»,- ընդգծեց Մեխակ Ապրեսյանը:

Մյուս բանախոսը՝ «Իրազեկ և պաշտպանված սպառող» հասարակական կազմակերպության նախագահ Բաբկեն Պիպոյանը նշեց, որ հանգստի բաղադրիչն իր մեջ ներառում է նաև վարկերի մարում ու կրթության բաղադրիչը. «Չպետք է մոռանանք նաև վարկերի մարման և կրթության բաղադրիչի մասին: Նվազագույն՝ 55 հազար դրամ աշխատավարձ ստացողը կարողանում էր կամ երեխային կրթության տալ, կամ  ազատվել մեկ ամսվա  վարկի մարումից»,- ասաց Բաբկեն Պիպոյանը:

Նրա խոսքերով՝ կառավարությունը կասեցումն անում է չարաշահումների պատճառով, այսինքն՝  ոլորտը չի վերահսկվում: «Սա նշանակում է, որ չարաշահումներն այնպիսի մակարդակի վրա են, որ կասեցնում են հանգստի բաղադրիչը: Իսկ իմ ենթադրություններով՝  հանգստի բաղադրիչը կրճատում են ոչ թե նրա համար, որ ոլորտում չարաշահումներ կան, այլ պետությունը գնում է բյուջեի խնայողության»,-ասաց նա:

Ըստ Բաբկեն Պիպոյանի՝  սոցփաթեթի  ներդրման ժամանակ հայտարարում էին, որ պետական աշխատողները հնարավորություն կունենան հանգստանալ և դա  կբարձրացնի նաև  նրանց աշխատունակությունը: Բայց այդ, հիմնավորում էին , որ այն կնպաստեր հյուրանոցային բիզնեսի զարգացմանը, ինչը իր հերթին կնպաստեր զբոսաշրջության զարգացմանը. «Այսինքն՝ հիմա մենք կասեցնում ենք այն բոլոր դրական միտումները, որոնք  որպես բարեփոխում անում էր պետությունը»:

Բաբկեն Պիպոյանը նաև նշեց, որ սոցփաթեթի շահառուները բացառապես պետական աշխատողներ են, իսկ պետական աշխատողը չի կարող ընդվզել, ուստի այս դեպքում բյուջետային խնայողություն անելը շատ ավելի հեշտ է:  

Այսպիսով, ըստ Բաբկեն Պիպոյանի, գործադիրը  վերահսկողական և աշխատանքի կազմակերպման տեսանկյունից ունեցել է բացթողումներ, սակայն դրանց համար պատասխանատվություն չեն կրում նրանք, որոնք չեն կարողացել այս տարիների ընթացքում  առավել արդյունավետ և թափանցիկ աշխատեն:

Նա նաև նշեց, որ այս որոշումը հարված է քաղաքացիական ծառայողին, ով հնարավորություն չուներ ապահովել իր հանգիստը: «Եթե  պետական աշխատողը իր  70 հազար դրամ հանգիստը նախընտրում է փոխարինել 30 հազար դրամ կանխիկ գումարով,  դա  նշանակում է, որ նա սոցիալապես վատ պայմաններում է ապրում»,-ասաց Բաբկեն Պիպոյանը: