Ձեր վստահելի աղբյուրը

«Ոսկե ծիրան» երևանյան փառատոնը մեծ ուշադրություն է դարձնում տարածաշրջանի երկրների կինոներին, մասնավորապես  վրացական: Պատճառը ոչ միայն այն է, որ նրանք մեր հարևաններն են, և մենք պետք է, որ լավ իմանանք նրանց, նաև այն պատճառով, որ վրացական կինոն  իսկապես հետաքրքիր զարգացում է ապրում,- լրագրողների հետ հանդիպման ժամանակ ասաց «Ոսկե ծիրան» փառատոնի ծրագրերի տնօրեն Միքայել Ստամբոլցյանը:

Ըստ նրա, վրացական կինո մի նոր սերունդ է եկել, որը մի կողմից զարգացնում է արդեն ունեցած լավ, հիանալի կինոյի ավանդույթները, մյուս կողմից իր ասելիքն է իր հետ բերում:

«Երբ դիտարկում ենք այս նոր սերնդի ռեժիսորների ֆիլմերը, զգում են, թե ինչ է կատարվում այդ երկրում, ինչպես են ապրում այդ մարդիկ, զգում ենք Վրաստանի ժամանակի նեռվը: Մի բան, որ գուցե ամենաարժեքավորն է արվեստում, երբ հաղորդակից ենք լինում հասարակ մարդկանց կյանքին»,- նշեց կինոգետը:

Միքայել Ստամբոլցյանը ներկայացրեց կինոփառատոնի Միջազգային խաղարկային ֆիլմ մրցույթում ընդգրկված վրացի ռեժիսոր Նինո Բասիլիայի «Աննայի կյանքը» ֆիլմը՝ նշելով, որ հանձնաժողովը միաձայն ընտրեց այս ֆիլմը մրցույթի համար:

Երիտասարդ, միայնակ մայրը որոշում է մեկնել Ամերիկա՝ բարելավելու իր և աուտիզմով հիվանդ երեխայի կյանքը: Աննան ռիսկի է դիմում, վաճառում է տունը և գումարը վճարում  մի մարդու, ով խոստանում է նրա համար անօրինական ճանապարհով դեսպանատնից վիզա ձեռք բերել: Պարզվում է, որ այդ մարդը խարդախի մեկն է և որոշել է Աննայի գումարն օգտագործել  սեփական ընտանիքին արտասահման տանելու համար: Աննան, կորցնելով գումարը հետ ստանալու բոլոր հույսերը, առևանգում է այդ մարդու վեցամյա  աղջկան:

Ֆիլմն  այս տարվա ընթացքում արդեն երկու մրցանակի է արժանացել՝  Վալենսիայի Կինոլուսարձակ միջազգային փառատոնում ճանաչվել է «Լավագույն ֆիլմ», Բուենոս Այրեսի Construir Cine միջազգային կինոփառատոնում ստացել է «Արժանիք» մրցանակը:

Ասուլիսին ներկա ֆիլմի ռեժիսոր, սցենարի հեղինակ Նինո Բասիլիան նախ ասաց, որ մեծ պատիվ է իր համար մասնակցել «Ոսկե ծիրան» փառատոնին: Ըստ նրա, լավ ռեժիսոր լինելու համար  պետք է շատ արկածներ ունենալ, շատ բաների միջով անցնել: Նինոն նշեց, որ ինքը որպես ռեժիսոր  երկար փորձ չունի: Սկզբում նկարահանել է վավերագրական ֆիլմեր, քանի որ, նրա խոսքով, Վրաստանում շատ դժվար է ֆիլմի ֆինանսավորում գտնելը: Նինո Բասիլիան իր հեղինակած սցենարի համար արժանացել է Վրաստանի ազգային կինոկենտրոնի մրցանակին և նկարահանել  իր առաջին խաղարկային ֆիլմը՝ «Աննայի կյանքը»:

«Սա եռագրության առաջին ֆիլմն է: Երկրորդ և երրորդ ֆիլմերում կանայք նույնպես գլխավոր դերում են լինելու: Միշտ ցանկացել եմ ցույց տալ, թե կանայք կյանքում ինչպես են պայքարում, ինչքան ուժեղ են»,- նշեց ռեժիսորը:

Ն. Բասիլիան ասաց, որ  իրական պատմություն է, նման բաներ ոչ թե մեկ, այլ մի քանի անգամ է պատահել:

«Ես ինքս ներգրավված եղել եմ նման իրադրությունում: Իմ ընկերներից մեկը խնդրեց գտնել մեկին, ով կկարողանա օգնել այդ հարցում: Ի վերջո մենք փրկվեցին, այդ մարդը չկարողացավ  մեզանից գումար շորթել»,-նշեց Նինոն՝ հավելելով, որ շատ պատմություններ գիտի, թե ինչպես են վրացի կանայք ցանկացել Կանադայով, Մեքսիկայով անցնել ԱՄՆ, նույնիսկ խողովակի միջով են փորձել անցնել:

Երիտասարդ ռեժիսորը նշեց, որ ֆիլմի միջոցով նաև ցանկանում է ցույց տալ, թե միայնակ մայրը ինչպես կարող է պայքարել, կյանքում գտնել իր տեղը:

«Սա է ֆիլմի կարևոր ուղերձներից»,- ընդգծեց  Ն. Բասիլիան: