Ձեր վստահելի աղբյուրը

Ախալքալաքի շրջանի հայաբնակ Վաչիան գյուղում հուլիսի 10-ի գիշերը դաժան սպանության զոհ դարձած Քաչոտյան ընտանիքի և նրանց սպանության մեջ մեղադրվող Նոդար Ակոպովի տները իրարից ընդամենը 100 մետր հեռավորության վրա են գտնվում: Այս մասին գրում է «Ալիք» լրատվամիջոցը:

«Հարևաններից» 100 մետր հեռավորության վրա է գտնվում նաև գյուղի գերեզմանատունը, որտեղ հուլիսի 13-ին, տեղի ունեցավ Քաչոտյանների հուղարկավորությունը:

Գյուղի բնակիչների հետ ունեցած  զրույցներից  լրատվամիջոցը պարզել է, որ դաժան սպանության մեջ մեղադրվող Նոդարի հայրը Տաբածկղուրիից է եղել: Նա Վաչիանում չի ծնվել, սակայն փոքր տարիքից ապրել է գյուղում: Ամուսնացել է համագյուղացու հետ և ապրել հարևանությամբ գտնվող` Քաչոտյաններին պատկանող տանը: Մարդասպանության մեջ մեղադրվող Ակոպովի կինը հղի է և հանցագործությունից հետո վրեժխնդրությունից խուսափելու նպատակով Ոստիկանությունը ընտանիքը տեղափոխել է:

«Գյուղացիներից ոմանք գտնում են, որ տղան (նկատի ունի Նոդար Ակոպովին) սպանության նպատակով չի մտել տուն, նա պարզապես փողի կարիք է ունեցել: «Խաղացել՝ պարտվել է երևի, կամ բանկում է պարտք ունեցել»,- ասում են յուղացիները:

Ենթադրություններ կան, թե մարդասպանը դիմակով ներխուժել է տուն և փող պահանջել, երբ Օֆելյան փողը տվել է, դուրս գալու պահին ձայնից ճանաչել է հարևանին, տվել է նրա անունը հարցրել է «դու ե՞ս», տղան այդ պահին խուճապից հարվածել է, ձայնի վրա են եկել նաև երեխաները…

Հաջորդ օրը առավոտյան, երբ Օֆելյայի ծնողները հայտնաբերել են դիակներն ու օգնություն կանչել, այդ տղան նույնպես այնտեղ է եղել, իբր ոչինչից տեղյակ չէ: Հետո, երբ Ոստիկանությունը գյուղի երկու տասնյակ երիտասարդների հետ Նոդար Ակոպովին տարել է քննելու որպես կասկածյալի, վերջինս` ինքնախոստովանականով է հանդես եկել:

Նույն օրը, Վրաստանի ՆԳՆ-ը փոքրիկ տեսանյութ հրապարակեց, որտեղ Ոստիկանության աշխատակիցների ուղեկցությամբ Ակոպովը (տեսանյութում դեմքը փակված է), հանցագործության վայրում` Քաչոտյանների տանը անվտանգության աշխատակիցներին ներկայացնում է եղելությունը:

Հարևաններից մեկը «Ալիք»-ի հետ զրույցում նշել է, որ հանցագոծության մասին նա և մի շարք այլ գյուղացիներ իմացել են միայն հաջորդ օրը: «Երեխաները ասացին, թե Վաղո հոպարի տանը հրդեհ է բռնկվել: Այդպես էր տարածվել, իրականում կրակ չկար: Դեպքը գիշերն է պատահել, իսկ առավոտյան առաջինը նրանց մահացած կնոջ ծնողներն են տեսել»,- պատմել  են համագյուղացիները:

Գյուղի բնակիչների  տարբեր վարկածներ էին ասում, իբր հանցագործությանը մասնակցել են մի քանի հոգի: Ներկայում, սակայն, ձերբակալված է միայն մեկ հոգի` Նոդար Ակոպովը:

Ակոպովի նկատմամբ քրեական գործ է հարուցվել հուլիսի 13-ին: Մեղադրող կողմը պահանջում է քրեական գործը քննել` կանխամտածված սպանության մեղադրանքով: Նշվում է նաև, թե  չի բացառվում սպանությունների մեջ մի քանի անձանց հնարավոր ներգրավվածությունը, սակայն այս պահին դեռեւս, Վրաստանի Ներքին գործերի նախարարությունը զերծ է մնում մեկնաբանություններից: