Ձեր վստահելի աղբյուրը

ՀՀ կառավարության այսօրվա նիստում Վերահսկիչ պալատի նախագահ Իշխան Զաքարյանը ներկայացրեց սոցփաթեթների վերաբերյալ կատարած ուսումնասիրության արդյունքները:

Հիշեցնենք, որ ՀՀ վարչապետը մարտի 24-ին հանձնարարել էր էկոնոմիկայի ու ֆինանսների նախարարություններին՝ Վերահսկիչ պալատի հետ միասին ուսումնասիրություններ իրականացնել:

Իշխան Զաքարյանը նշեց, որ Վերահսկիչ պալատն ուսումնասիրություններ է իրականացրել սոցիալական փաթեթի շահառուների հանգստի կազմակերպման մասով կատարված ծախսերի հետ: Արդյունքում, ըստ նրա,  ՀՀ խոշոր զբոսաշրջային համայնքներ հանդիսացող Ծաղկաձորի, Դիլիջանի, Ջերմուկի, Աղվերանի, Արզնիի, Արտավազի և  Հանքավանի ընտրանքային կարգով ուսումնասիրված հյուրանոցներում  հայտնաբերել են շուրջ 300 միլիոն դրամի տարբեր տիպի խախտումներ:

Մասնավորապես, ստուգումներ անցկացնելով Ծաղկաձորի 21 հանգստյան տներում ու հյուրանոցներում, հայտնաբերվել է 128 մլն 681 հազար դրամի խախտում, Ջերմուկում ստուգումներ են անցկացվել 13 հյուրանոցներում ու հանգստյան տներում, որտեղ հայտնաբերվել է 62 մլն 437 հազար դրամի խախտում, Դիլիջանում՝  43 մլն 490 հազար դրամի, Արզաքանում՝  27 մլն 146  հազար դրամի, Արզնիում՝ 22 մլն 717 հազար դրամի, Արտավազում՝ 10 մլն 230 հազար դրամի, Հանքավանում՝  4 մլն  314 հազար դրամի խախտումներ: Խախտումների ընդհանուր թիվը շուրջ  300 միլիոն դրամ է:

Ըստ Իշխան Զաքարյանի՝ խախտումներն առաջացել են հետևյալ պատճառներով՝ նախ պետբյուջեից գումարները տրամադրվում են երկու ուղղությամբ՝ հանգստի կազմակերպում և առողջապահության կազմակերպում:  Այս առումով  ծախսերը կատարվում են զբոսաշրջային օպերատորների կողմից, որոնց լիցենզավորում է ՀՀ էկոնոմիկայի նախարարությունը:

«Նախարարությունից տրամադրված տեղեկատվության համաձայն, Հայաստանում և Արցախում սոցիալական փաթեթի հանգստի բաղադրիչի իրականացման համար համագործակցել են 69 զբոսաշրջային օպերատորներ, որոնցից ՎՊ-ն ուսումնասիրություն է կատարել 7-ում և  հայտնաբերել, որ որոշ օպերատորներ լիարժեք չեն կատարել հյուրանոցների հանդեպ ունեցած պայմանագրային պարտավորությունները,  ՀՀ պետբյուջեից ստացված գումարները ծախսել են այլ նպատակներով, ինչի պատճառով կուտակվել են այդ պարտքերը»,- ասաց Իշխան Զաքարյանը:

Բացի այդ,  ըստ նրա, ամրագրման հավաստագրերը տրվել են սոցիալական փաթեթի շահառուների անունով, սակայն հաճախ սոցփաթեթից փաստացի օգտվել են շահառու չհանդիսացող քաղաքացիներ: Երրորդ՝ մի խումբ զբոսաշրջային օպերատորների մոտ առկա են սոցփաթեթի սոցիալական փաթեթի գումարների ապօրինի կանխիկացման դեպքեր, ինչը հակասում է ՀՀ սահմանադրությանը և օրենքներին: Բացի այդ, որոշ  զբոսաշրջային օպերատորներ սոցփաթեթի ծառայություններ են մատուցել, սակայն ընդգրկված չեն եղել  փաթեթի հանգստի ապահովման ծառայության մեջ , հաշվառված չեն եղել էկոնոմիկայի նախարարության կողմից և գործել են հաշվառված օպերատորների հետ կնքված ենթագործակալական պայմանագրերի հիման վրա, ինչը որևէ որոշմամբ ամրագրված չէ:

Խախտումներից մեկն էլ այն է, որ սոցփաթեթի գումարները պետբյուջեից փոխանցվել են բանկերում բացված հաշիվներին, սակայն մի շարք բանկերի կողմից զբոսաշրջային օպերատորներին փոխանցումներ չեն կատարվել: 

«Ելնելով վերոգրյալից՝ Վերահսկիչ պալատն առաջարկում է ՀՀ կառավարությանը՝ ոլորտը կարգավորող իրավական ակտերի պահանջները շրջանցելու, ինչպես նաև սոցիալական փաթեթի գումարների անօրինական կանխիկացման դեպքերը բացառելու համար լրամշակել սոցփաթեթի հանգստի բաղադրիչին վերաբերվող դրույթները», -ասաց Իշխան Զաքարյանը:

Վարչապետ Հովիկ Աբրահամյանի հարցին, թե որոշե՞լ է Վերահսկիչ պալատի խորհուրդը, ինչ են անելու ուսումնասիություների արդյունքները, ՎՊ նախագահն ասաց, որ ուսումնասիրություների արդյունքները հասկանալու համար պետք է 100 տոկոսով լիցենզավորված կառուցներում ուսումնասիրություն կատարվի: Իշխան Զաքարյանը խնդրեց, որ վարչապետի վերահսկողական ծառայությունը ևս համագործակցի իրենց հետ:

Հովիկ Աբրահամյանը հիշեցրեց, որ գործադիրի նախորդ նիստի ժամանակ 2017-2019 թթ. միջնաժամկետ ծախսային ծրագրերը քննարկելիս անդրադարձել են սոցիալական փաթեթի ֆինանսավորման հարցին և հայտարարել, որ նախարարությունների առաջարկով կասեցրել են այդ գործընթացը:Նրա խոսքերով՝ հարցի շուրջ բազմաթիվ հարթակներում տեղի են ունեցել անհիմն քննարկումներ:

«Այդ կասեցումը նվիրված էր հենց այս ստուգումների արդյունքներին, կան յուրացումներ, խախտումներ: Դրա համար էլ շատ ճիշտ էր կասեցնել ծրագիրը 2017-2019 թթ. միջնաժամկետ ծրագրի նախագծում, իսկ 2016 թվականի բյուջեով նախատեսված ծախսերն իրականացնում ենք, որևէ խոչընդոտ կամ կասեցում չկա: Եվ ես համոզված եմ, որ արդյունքներն ունենալուց հետո 2017 թվականի պետական բյուջեի նախագծում քննարկելիս՝ մենք սոցիալական փաթեթի այդ բաղադրիչն անպայման կընդգրկենք: Բայց կարևորն այն է, որ բոլոր պատկան մարմինները, ում նախորդ նիստին տրվել է հանձնարարական, ուսուսմնասիրեն և այն բոլոր բացերը, ճանապարհները, որոնց միջոցով տեղի են ունենում խախտումները, փակվեն»,- ասաց վարչապետը: