Ձեր վստահելի աղբյուրը

ՀՀ կառավարությունն այսօրվա նիստում  որոշում կայացրեց գումար տրամադրել Արագածոտնի, Արմավիրի և Լոռու մարզպետարաններին:

ՀՀ տարածքային կառավարման ու զարգացման նախարար Դավիթ Լոքյանը հայտնեց, որ 27 մլն 400 հազար դրամ կտրամադրվի Արագածոտնի մարզում 20 բնակիչների տների տանիքների, մշակույթի տան  տանիքի վերանորոգման, ինչպես նաև դպրոցի սպորտդահլիճի վերականգման համար: Նրա խոսքերով՝ խոշոր գյուղատնտեսական կենտրոն համարվող տարածքների համար գյուղացիների պահանջով նախատեսվել է հակակարկտային համակարգերի տեղադրում:

Նրա խոսքերով՝ Արմավիրի մարզպետարանին էլ  կհատկացվի 61,6 մլն դրամ, Լոռու մարզպետարանին՝ 16 մլն  դրամ:

Նախարարը նշեց, որ կիրակի օրվա հեղեղի արդյունքում Արմավիրում 20-ից ավելի համայնքներ ամբողջությամբ կորցրել են իրենց ռեսուրսները, համայնքների բնակիչների պահանջով կառավարության կողմից հատկացվել է 22  հակակարտային համակարգեր: 

«Քանի որ հանձնարարական ունենք այս խնդիրները փուլային դիտարկել, որպեսզի օժանդակությունն ավելի հասցեական դառնա, հաջորդ փուլում կներկայացվի Արմավիրի մարզում քամու հետևանքների վերացումը, Գեղարքունիքի ու Կոտայքի մարզերի համայնքների խնդիրները, որոնք հանձնարարությամբ արդեն ուսումնասիրվում են»,- նշեց Դավիթ Լոքյանը:
Ըստ նրա՝ Լոռու մարզում մեկ շաբաթ առաջ տեղի ունեցած հեղեղի արդյունքում ամբողջությամբ կոմունիկացիաների խաթարում էր տեղի ունեցել հինգ համայնքում ու շուրջ 13 բնակավայրերում: Լոռու մարզի այս բնակավայրերի համար 16 մլն դրամ է հատկացվում բնականոն կյանքը վերականգնելու համար:

«Ընդհանուր առմամբ, պրոբլեմը մեծ է, և այն ծրագրային մոտցումները, որ որդեգրել ենք, կառավարության առաջիկա  նիստերում կներկայացնենք»,- ասաց Դավիթ Լոքյանը:
Վարչապետ Հովիկ Աբրահամյանը նշեց, որ այս հարցը  քննարկել են ՀՀ նախագահի հետ, որոշում են կայացրել  քննարկել հանձնաժողովների առաջարկները և  փորձեն հնարավորինս օգնել մարդկանց:

«Պարզ է, որ մենք չենք կարող քաղաքացիների  բոլոր ցանկությունները բավարարել, երեկ մի քանի համայնքներում ենք եղել, իրոք մեծ աղետ է տեղի ունեցել: Մարդիկ վարկեր ունեն, ծախսեր են իրականացրել՝ ակնկալելով բերք ստանալ, իրացնել, որ հետո վարկերը մարեն: Առաջարկ կար, որպեսզի հետաձգվեն վարկերը: Ես պարոն Ջավադյանին խնդրում եմ և առաջարկում, որպեսզի առևտրային բանկերի հետ համագործակցեն, հնարավորինս գոնե մեկ տարով հետաձգենք գյուղացիների վարկերը: Իմ կարծիքով, նախարարությունները պետք է ակտիվ համագործակցեն մարզպետների, քաղաքապետերի, համայնքապետերի հետ, որ կարողանանք օգնել մեր քաղաքացիներին», ասաց Հովիկ Աբրահամյանը:

Նա նաև հայտնեց, որ երեկ Արթիկում են եղել, և անհիմն  են այն տեղեկությունները, որ որոշ հարթակներում հնչում են, թե աշխատանք չի կատարվում:

«Եղել ենք այն բնակարաններում, որտեղ աղետը եղել է, աշխատանքները ընթացքի մեջ են: Իհարկե քաղաքացիները միշտ էլ ցանկանում են ավելի շատ օգնություն ստանալ կառավարությունից, բայց  հանձնաժողովի ներկայացրած հաշվարկների հիման վրա մենք ֆինանսավորել ենք բոլոր այն առաջարկները, որոնք իրականացրել են հանձնաժողովները: Գործընթացը գնում է, ես որևէ դժգոհություն չնկատեցի, նույնիսկ շնորհակալական խոսքեր հնչեցին տարբեր քաղաքացիների կողմից»,- նշեց Հովիկ Աբրահամյանը: