Ձեր վստահելի աղբյուրը

ՀՀ էկոնոմիկայի նախարար Արծվիկ Մինասյանն այսօր  ասուլիսի ժամանակ անդրադառնալով  վրաց-ռուսական  սահմանին՝ Վերին Լարսում, ՀՀ տնտեսվարողների նկատմամբ անօրինական գործողություններին, ըստ որի՝ ռուսական կողմը  գումարներ է պահանջում նրանցից,  նշեց, որ իրենք նույնպես անօրինական գործողությունների վերաբերյալ ահազանգեր ստացել են:

Սակայն նախարարը չի կարծում, որ այդ ամենը կատարվում է ռուսական պաշտոնական կողմի գիտությամբ:

Արծվիկ Միանսյանի խոսքերով՝  քանի դեռ նման ահազանգերը կան, մտադիր են առաջիկայում  դրանք հավաքագրել և ներկայացնել ռուս գործընկերներին, քանի որ տարբեր հատվածներում խոչընդոտվում է ՀՀ քաղաքացիների նորմալ տեղաշարժը:

«Մենք վստահ ենք, որ ռուսական իշխանություններին  փաստերն ամբողջությամբ ներկայացնելու դեպքում, մեր գործընկերները կձեռնարկեն համապատասխան գործողություններ»,- ասաց նա:

Ըստ նախարարի՝  սրանք գործողություններ են, որոնք կարող են պատահել ցանկացած երկրում, բայց շատ կարևոր է, որպեսզի համապատասխան իրավասու մարմիններն իմանալով այդ մասին արագ արձագանքեն:

«Ակնկալում ենք, որ ռուս գործընկերներին այս հարցերը ներկայացնելուց հետո համատեղ կմշակենք մի այնպիսի համակարգ, որը թույլ կտա բացառելու նման անօրինական միջամտությունը մեր քաղաքացիների և տնտեվարող սուբյեկտների օրինական գործողություններին, մասնավորապես ԵԱՏՄ տարածք մուտք գործելուն»,- ասաց էկոնոմիկայի նախարարը:

Արծվիկ Մինասյանը նշեց նաև, որ որևէ մեկը ռուսական կողմին  չի ներկայացրել կամ չի ներկայացնելու մեղադրանք կոռուպցիայի մասով:

«Մենք ընդամենը ասում ենք, որ այն հնարավորությունը, առավելությունը, որ պետք է ունենայինք  ԵԱՏՄ-ում ՝ քաղաքացիների և ապրանքների ազատ տեղաշարժի ապահովման համար, ապա պետք է համատեղ ձեռնարկենք այդ իրավունքների իրացման լիարժեք մեխանիզմներ:»,- ընդգծեց նախարարը:

Մինչ այս Վրաստանի վարչապետ Գեորգի Կվիրիկաշվիլին հաստատել էր, որ տարանցիկ ճանապարհի հարցը Ռուսաստանի հետ քննարկելու համար եղել է Հայաստանի միջնորդությունը, «սակայն Ռուսաստանը բեռնափոխադրումների հարցը կապել է քաղաքական պահանջների հետ, առաջարկելով դրա փոխարեն ճանաչել Հարավային Օսեթիայի Հանրապետությունը, այդ պատճառով էլ գործընթացը սառեցվել է»: