Ձեր վստահելի աղբյուրը

Մարտական գործողությունների ընթացքում զոհված զինծառայողների ընտանիքներին կայուն եկամտով ապահովելու ծրագիրն արդեն պատրաստ է, ներկայացվել է ՀՀ կառավարություն, իսկ այսօր արդեն այն կտեղադրվի էկոնոմիկայի նախարարության կայքում: Այս մասին այսօր լրագրողների հետ հանդիպման ժամանակ պատասխանելով Panorama.am-ի հարցին՝ ասաց ՀՀ էկոնոմիկայի նախարար Արծվիկ Մինասյանը:

Հիշեցնենք, որ ապրիլյան քառօրյա պատերազմից հետո վարչապետ Հովիկ Աբրահամյանը էկոնոմիկայի նախարարին հանձնարարել էր մարտական գործողությունների հետևանքով զոհված անձանց ընտանիքների համար կայուն եկամտի աղբյուր ստեղծելու նպատակով մշակել և ՀՀ կառավարություն ներկայացնել համապարփակ առաջարկ՝  նշելով նաև ֆինանսավորման աղբյուրները:

Արծվիկ Մինասյանը նշեց, որ խոսքը միայն ապրիլյան քառօրյա պատերազմի մասնակիցների մասին չէ, այլ՝ ՀՀ ու Արցախի սահմանների պաշտպանության ժամանակ զոհվածների: Պարզապես այժմ առաջնահերթ են ապրիլյան պատերազմի ժամանակ զոհվածների ընտանիքները:

Նրա խոսքերով՝   ծրագրի մեջ ներգրավված են նաև պաշտպանության,  աշխատանքի և սոցիալական հարցերի, տարածքային կառավարման զարգացման նախարարությունները, այլ պետական կառույցներ: «Նպատակը հետևյալն է՝ այս ընտանիքներում բացահայտել անձանց, ովքեր ի վիճակի են ձեռնարկատիրական գործունեությամբ  զբաղվել, իսկ եթե չունեն համապատասխան կրթություն, ապա ապահովել պայմանների ամբողջական տրամադրում, դրանք կարող են լինել սարքավորումների,  կոնկրետ գումարի, պայմանագրերի կնքման տեսքով: Այսինքն՝ բոլոր մեխանիզմները կիրառվելու են, որպեսզի  առաջին հերթին ապահովեն անձանց ձեռնարկատիրական գործունեությունը»,- ասաց Արծվիկ Մինասյանը:

Ըստ նրա՝  եթե այդ մարդիկ չեն կարող ձեռնարկատիրական գործունեությամբ զբաղվել, ապա նրանց կառաջարկվի որպես բաժնետեր հանդես գալ տարբեր ձեռնարկություններում,  որպեսզի նրանք կարողանան մշտական եկամուտ ունենալ:

Արծվիկ Մինասյանի խոսքերով՝  նախատեսում են, որ ծրագրին պետական միջոցներից բացի ներդրումներ արվեն մասնավոր հատվածի  կողմից: «Իհարկե, հիմնական բեռը բյուջեի վրա է լինելու, բայց առաջարկելու ենք կամավոր մուծումների ժամանակ այն անձինք, կազմակերպությունները, ովքեր 10 մլն և ավելի դրամ կփոխանցեն այս ծրագրին, իրենք կամ իրենց ներկայացուցիչները կընդգրկվեն կառավարման խորհրդի մեջ և կկայացնեն համապատասխան որոշումները՝ այս կամ այն անձի ընտանիքին աջակցություն ցուցաբերելու համար»,- ասաց Արծվիկ Մինասյանը:

Նա նաև տեղեկացրեց, որ այս տարվա համար շուրջ 500 մլն դրամի ծախս են նախատեսում: