Ձեր վստահելի աղբյուրը

ՀՀ ԱԳՆ-ն, կառավարությունը մեծապես կարևորում են քաղհասարակության ներգրավածությունը ինչպես ԵՄ հետ տարբեր ոլորտներում նախաձեռնությունների շրջանակում, այնպես էլ երկրում իրականացվող բարեփոխումների ծրագրին: Քաղհասարակությունն իր կարևոր դերակատարությունն ունի ՀՀ-ԵՄ համագործակցության խթանման հարցում,- «Գործընկերություն հանուն բաց հասարակության» նախաձեռնության  կազմակերպած «Քաղաքացիական  հասարակության  դիտարկումները ԵՄ-Հայաստան հարաբերությունների վերաբերյալ» հանրային քննարկմանն ասաց ՀՀ արտաքին գործերի նախարարի տեղակալ Կարեն Նազարյանը:

Ներկայացնելով Երևանի և Բրյուսելի միջև տեղի ունեցած և ունեցող զարգացումներն ու փոխգործակցությունը, փոխնախարարը դրանք բնորոշեց բավականին ինտենսիվ: Նա նշեց, որ վերջին շրջանում ԵՄ հետ ավելի աշխուժացել է քաղաքական երկխոսությունը, բարձրաստիճան փոխայցելությունները, բարձր մակարդակի շփումները:

«Այդ հանդիպումները, այցելություններն առիթներ են ամենաբարձր մակարդակով վեր հանելու մեր համագործակցությանն առնչվող խնդիրները, քննարկել տարածաշրջանային զարգացումները և այդ զարգացումների հետ կապված ծանոթանալ կողմերի գնահատականներին և դիրքորոշումներին»,- ասաց նա:

Ըստ Կ. Նազարյանի, ԵՄ հետ առանձնակիորեն քննարկվել է  վերանայված եվրոպական քաղաքանության հետագա ընթացքը, հայկական կողմը ողջունել է, որ  եվրոպական հանձնաժողովը վերանայման գործընթացին ներգրավել է ոչ միայն գործընկեր պետություններին, այլ այդ երկրների քաղհասարակությանը:

«Մենք առիթ ենք ունեցել ամենաբարձր մակարդակով հնչեցնելու, արժևորելու տարբերակված մոտեցման կիրառումը, միաժամանակ չափազանց էական ենք համարել սահմանել, պահպանել այն ընդհանրականը, ինչը միավորում է մեզ բոլորիս որպես գործընկերության, տվյալ դեպում Արևելյան գործընկերություն: Համոզված ենք, որ այդ ընդհանրության հիմքում  պետք է լինի տարբերություններով հանդերձ բոլոր գործընկեր պետությունների հանձնառությունն ընդհանուր արժեքների, մարդու իրավունքների, օրենքի գերակայությանն, ժողովրդավարության զարգացմանն, խաղաղությանն ու կայուն զարգացմանն ու ապահովմանն ուղղված ջանքերը»,- նշեց Կ. Նազարյանը:

Խոսելով ՀՀ-ԵՄ  նոր համապարփակ իրավական փաստաթղթի բանակցություների մասին, փոխնախարարն ասաց, որ արդեն կայացել է քաղաքական, ոլորտային, առևտրային հարցերի շուրջ բանակցային մի քանի փուլ, որոնք կարելի է բնութագրել արդյունավետ, իսկ բանակցային գործընթացը՝ դինամիկ:

«Մեր նպատակն է  բանակցություների արդյունքում ձևավորել Հայաստան-Եվրամիություն հարաբերությունները կարգավորող իրավական հիմք, ինչը կարտացոլի ինչպես Եվրամիության հետ նախորդ քննարկումների բովանդակությունը, այնպես էլ այսօրվա մեր հարաբերությունների խորությունը և էությունը»,- նշեց նա՝ հավելելով, որ ակնկալում են տեսանելի ապագայում կկարողանան ավարտին հասցնել այս կարևորագույն գործընթացը:

Կարեն Նազարյանն ասաց, որ Հայաստանը բարձր է գնահատում ԵՄ հավասարակշիռված դիրքորոշումը Լեռնային Ղարաբաղի հիմնախնդրի վերաբերյալ, ինչպես նաև խնդրի համապարփակ կարգավորման համար բարենպաստ մթնոլորոտ ստեղծելու հանձնառությունը: 

Փոխնախարարը նաև նշեց, որ Հայաստանը մեծապես կարևորում է տարիների ընթացքում ԵՄ կողմից Հայաստանին ցուցաբերված շարունակական աջակացությունը և օժանդակությունը,  որը կարևոր դեր է ունեցել ՀՀ բարեփոխումների իրականացման, ինստիտուցիոնալ կարողությունների զարգացման գործում, պատրաստկամ է այս ուղղությամբ շարունակելու իր ակտիվ երկխոսությունը: