Ձեր վստահելի աղբյուրը

ՀՀ էկոնոմիկայի նախարար Արծվիկ Մինասյանն այսօր լրագրողների հետ հանդիպման ժամանակ անդրադառնալով  աղմուկ բարձրացրած ազգային բրենդի վերաբերյալ հարցին, նշեց, որ ներկայումս դրա հետ կապված մանրամասն ուսումնասիրություններ են ընթանում:

Նշենք, որ ամերիկյան GK Brand ընկերության հիմնադիր և ղեկավար Վազգեն Քալաջյանն օրեր առաջ LinkedIn ցանցի իր էջում ներկայացրել է Հայաստանի բրենդը` լոգոն և կարգախոսը: Այս բրենդի նպատակն է Հայաստանն ավելի ճանաչելի դարձնել աշխարհում: Մինչդեռ  այն Հայաստանում  լուրջ քննադատությունների առիթ է հանդիսացել: Ի դեպ՝ դրա ստեղծման գինը 400 հազար դոլար է:

Արծվիկ Մինասյանի խոսքերով՝ ազգային բրենդ ստեղծելու հարցը բարձրացվել է  2008 թվականին: Ըստ նրա՝  պետբյուջեից հատկացվել է 62 մլն դրամ, իսկ մնացած գումարները տվել են դոնոր կազմակերպությունները:

«Վճարումն ամբողջ ծավալով չի իրականացվել, քանի որ 5 կետից 2-ի մասին է խոսքը գնում: Որևէ մտահոգություն, անհանգստություն, թե կառավարությունը կարող է ընդունել մի բրենդ, առանց հանրության կարծիքը հաշվի առնելու, նման բան չի կարող լինել»,- ասաց Արծվիկ Մինասյանը:

Ինչ վերաբերում է բրենդի կարգախոսին՝  «Պատմությունը դեռ նոր է սկսվում», նախարարը նշեց, որ այն չի արտահայտում այն, ինչի մասին կարծիք կարող է ձևավորվել:

«Այն Հայաստանի պատմության հետ կապ չունի, և այս կարգախոսի հիմնական նպատակն ուղղված է այն մարդկանց, որոնք երբեք չեն եղել Հայաստանում: Այսինքն՝ այսպիսով կոչ է արվում՝  գան Հայաստան ու կերտեն իրենց պատմությունը: Բացատրությունը սա է, և այստեղ խնդիրներ կան: Դրա համար բոլոր հարցերը քննարկվում են»,- ասաց Արծվիկ Մինասյանը` հավելելով՝  պարտադիր չէ, որ Հայաստանն ունենա ազգային բրենդ: