Ձեր վստահելի աղբյուրը

«Ոսկե ծիրան» Երևանի 13-րդ միջազգային կինոփառատոնի «Վավերագրական ֆիլմ» մրցույթում ընդգրկված է բուլղարացի ռեժիսոր Բորիս Կոլևի «Մահացու ցատկ» ֆիլմը:

Լրագրողների հետ հանդիպմանը ռեժիսորն ասաց, որ շատ հուզված է՝ այցելելով Հայաստան. «Մայրս հայ է: Նախնիները գաղթել են Հայաստանի այն մասից, որը հիմա Թուրքիայի տարածքում է: Ես իմ ընտանիքից առաջին մարդն եմ, որ եկել է Հայաստան»:

Ներկայացնելով իր ֆիլմը՝ Բորիս Կոլևն ասաց, որ  այն բուլղարացի ծանրորդ Անգել Գենչևի մասին է, ով  1988 թ. Սեուլում կայացած օլիմպիական խաղերում դառնում է աշխարհի չեմպիոն: Նրա մրցակիցներից է եղել նաև հայազգի ծանրորդ Միլիտոսյանը:

1988 թ, Օլիմպիական խաղեր, Սեուլ, Հարավային Կորեա: Բուլղարացի ծանրորդ Անգել Գենչևը, գերազանցելով բոլոր մրցակիցներին և ապշեցուցիչ համաշխարհային ռեկորդներ սահմանելով, ոսկե մեդալի է արժանանում 67,5 կգ քաշային կարգում: Իր վերջին մոտեցումից հետո Անգելն ուրախությունից հետցատկով շրջադարձ է անում, որն իսկույն դառնում է Օլիմպիական խաղերի ոչ պաշտոնական խորհրդանիշը: Աշխարհի բոլոր հեռուստաալիքները և լրատվական գործակալությունները տարածում են այդ ցատկի տեսագրությունը: Լրատվամիջոցներն Անգել Գենչևին հռչակում են Սեուլի օլիմպիական խաղերի հերոս: Ընդամենը մեկ օր անց չեմպիոնը, որ համարվում էր ծանրամարտի պատմության մեծագույն տաղանդներից մեկը, հայտնվում է դոպինգային ցնցող սկանդալի կենտրոնում: Եվ սա Անգելի՝ դեպի դժոխք կատարած վայրէջքի և վերադարձի սկիզբն է միայն:

«Կորցնում է մեդալը, երբ վերադառնում է Բուլղարիա, նրան ասում են, որ դավաճանել է սոցիալիստական սկզբունքները: Ի վերջո՝ նա փողոցում է հայտնվում, վերածվում է գանգստերի,  հայտնվում բանտում»,- պատմեց ռեժիսորը:

Նա նշեց, որ ոչ թե հետաքննության կարգի ֆիլմ է, այլ փորձել է ստեղծել էքզիստենցիալ ֆիլմ: Բորիս Կոլևի խոսքով, գործընկերներից մեկն ասել է, որ ֆիլմը ներկայացված է Դոստոևսկու ոճով:

Ասուլիսին ներկա վավերագրող ռեժիսոր Արման Երիցյանի բնորոշմամբ՝ ֆիլմում շատ ճիշտ համադրված են արխիվային նյութերն ու իրական պատմությունները, ինչը մեծ հարստություն է վավերագրական ֆիլմերի համար:

«Այն խնդիրը, որը ներկայացված է ֆիլմում, ռեժիսորը պետք է շատ ուշադիր լիներ, որպեսզի կարողանար գրագետ համադրում աներ: Ստացվել է»,- նշեց նա:

«Մահացու ցատկ» ֆիլմը 2015-ին Բուլղարիայի վավերագրական ֆիլմերի ազգային փառատոնում արժանացել է «Ոսկե ռիտոն» մրցանակի՝  լավագույն ռեժիսորական աշխատանքի  համար: