Ձեր վստահելի աղբյուրը

Սիսիանում սեպտեմբերին կայանալիք քաղաքապետի ընտրություններում մի քանի տղամարդկանց հետ միասին կին է պայքարի դուրս գալու. նա լրագրող, Սիսիանի ավագանու անդամ, «Լուսավոր Հայաստան» կուսակցության տեղի գրասենյակի ղեկավար Սրբուհի Գրիգորյանն է:

Նկատենք, որ արդեն իսկ շրջանառվում են թեկնածուների անունները: Ըստ այդմ՝ Սիսիանի քաղաքապետի պաշտոնի համար շրջանառվում են Սյունիքի մարզպետարանի գյուղատնտեսության վարչության պետ Սամվել Թանգյանի անունը, որը համարվում է անձամբ մարզպետ Սուրիկ Խաչատրյանի թեկնածուն, Սիսիանի գործող քաղաքապետ Աղասի Հակոբջանյանի և նախկին քաղաքապետ Լավրենտ Սարգսյանի որդու՝ Արթուր Սարգսյանի անունները:

«Պահն է հասունացել, որ պետք է ժողովրդի ներկայացուցիչը առաջադրվի ու ներկայացնի ժողովրդի շահերը: Փորձենք հաղթել», -Panorama.am-ի թղթակցի հետ զրույցում ասաց Սրբուհի Գրիգորյանը:

Հարցին, թե ինչպե՞ս է համարձակվում Գրիգորյանը դուրս գալ Սյունիքի մարզպետ Սուրիկ Խաչատրյանի դեմ, մեր զրուցակիցը ի պատասխան նախ ժպտաց, այնուհետև արձագանքեց.«Էն վախի մթնոլորտը, որ Սյունիքի վերաբերյալ տարածված է երևաններում, այնքան էլ իրականությանը չի համապատասխանում: Ոչ մի վախ չկա: Իսկ իմ քայլը սովորական քայլ է, երբ համայնքի ավագանու անդամը տարիներ շարունակ շփվելով ժողովրդի հետ, նրա կողքին կանգնելով, ուղղակի ցանկանում է որոշում կայացնելու մակարդակից անցնել գործադրի մակարդակ»:

Տիկին Գրիգորյանի խոսքով, ինքն ունի համապատասխան կարողություններ և կարող է աշխատել քաղաքապետի պաշտոնում, կանգնել ժողովրդի կողքին և «փոխել ներքևից»:

«Իմ այս քայլը մի դիտեք որպես ընդդեմ մարզպետի քայլ: Ես դա անում եմ հանուն Սիսիանի: Ընդդեմ չկա: Շատ դժվար է, որովհետև չի լինում, երբ ոչ օլիգարխ մեկը, փորձի առաջադրվել՝ բոլորը փողատեր են, բոլորը բիզնեսներ ունեցող: Բայց ամեն դեպքում պետք է փորձել, պետք է հաղթել», -հավելեց տիկին Գրիգորյանը:

Քաղաքապետի կին թեկնածուն ընտրագրավ մուծելու համար տեսահոլովակ է թողարկել, որտեղ նշում է, որ իր ուժեղ կողմը ազնվությունն է: Ինչպե՞ս է ազնվությամբ փորձելու հաղթել փողը, վարչական ռեսուրսին, հարցին ի պատասխան Սրբուհի Գրիգորյանը նկատեց, որ արդեն իսկ ժողովրդի շրջանում խոսակցություններ շրջանառվում են ընտրակաշառք բաժանելու մասին խոսակցություններ:

«Մենք բնականաբար, չենք գնալու այդ քայլին, որովհետև մենք ունենք տարբեր հայացքներ ու դրանով էլ մտնելու ենք ընտրապայքարի մեջ: Ժողովրդի համբերությունն էլ հատել է, արդեն դանակը ոսկորին է հասել: ես իրենց ասում եմ՝ եթե փող կառաջարկեն, վերցրեք, դա ձեզանից վերցրած փողն է, բայց ընտրեք այնպիսի մեկին, որը չի գալու նորից ձեզանից վերցնի», -նշեց Սրբուհի Գրիգորյանը: