Ձեր վստահելի աղբյուրը

2:19
«Աէրոֆլոտը» հետ է վերադարձրել Մոսկվայից դեպի Անկարա թռչող ինքնաթիռը,-«ՏԱՍՍ»-ին հայտնել է ընկերության պաշտոնական ներկայացուցիչը:

2:17
Սաքարիա նահանգում զինվորականները տանկերով հասել են նահանգապետարան, ներխուժել են ներս:

2:12
Հաղորդվում է, որ ռազմական ուղղաթիռը կրակ է բացել Անկարայի վրա։  Դեպի Անկարայում վարչապետի գրասենյակ տանկեր են շարժվում, իսկ ճանապարհը արգելափակվել է մարդկանց կողմից:

2:07
Թուրքիայի Ազգային Մեծ Ժողովի շենքը շրջապատվել է տանկերով:

2:02
Թուրքիայի նախագահը ապաստան է հայցում Գերմանիայից։  Ըստ MSNBC-ի`  Էրդողանի ինքնաթիռի վայրէջքի թույլտվությունը մերժվել է։

Այժմ ինքնաթիռը փորձում է վայրէջք կատարել Հոլանդիայում։

1:58
Հաղորդվում է Անկարայում առաջին քաղաքացիական վիրավորների մասին:



1:53
Ուժգին պայթյուն է որոտացել Անկարայում՝ TRT հեռուստաընկերության շենքում, որը գտնվում է զինվորականների վերահսկողության տակ:

1:52
Մեծ Բրիտանիայի ԱԳ նախարարությունը Թուրքիայում Բրիտանիայի քաղաքացիներին խորհուրդ է տվել խուսափել հանրային վայրերից ու աչալուրջ լինել՝ մինչ իրավիճակը կհստակեցվի։

«Մենք մտահոգված ենք Անկարայում և Ստամբուլում ծավալված իրադարձություններով»,-ասվել է հայտարարության մեջ։

1:49
Անկարայում նախագահական նստավայրի մոտ կրակոցներ են հնչում: Նշվում է նաև ուղղաթիռից կրակ բացվելու մասին: Մեծ թվով մարդիկ շարժվում են դեպի նախագահական նստավայր:

1:48
ՌԴ ԱԳ նախարար Սերգեյ Լավրովը հայտարարել է, որ Թուրքիայում պետք է խուսափել արյունահեղությունից, և բոլոր հարցերը պետք է լուծվեն սահմանադրության շրջանակներում։

1:45
ԱՄՆ պետքարտուղար Ջոն Քերին հայտարարել է, որ տեղյակ է իրադարձություներից, սակայն ներկա պահին մանրամասներին չի տիրապետում։

«Հույս ունեմ, որ կլինի կայունություն և շարունակականություն Թուրքիայում»,-ասել է Քերին։

1:42
Թուրքիայի մի շարք նահանգներում մարդիկ  դուրս են գալիս փողոց:



1:39
Էրդողանը CNN-ին ասել է, որ այս գործողությունը խրախուսվել է «զուգահեռ կառույցի» կողմից։ Նա հայտարարել է, որ սա հեղաշրջման փորձ է փոքրամասնություն կազմող զինվորականների կողմից։ 

Ավելացրել է․ «Մենք կհաղթահարենք սա»։\


1:34
Էրդողանը, «Սկայպով» խոսելով թուրք լրագրողի հետ, երկրի բնակչությանը կոչ է արել դուրս գալ փողոց:

1:33
Թուրքիայի քաղաքացիներն արձագանքել են հեղաշրջման փորձին ու «լցվում» են փողոցները,- հայտնում է The Guardian-ը՝ հղում անելով Daily Sabah-ին։

1:30
Հայտարարվեց, որ Թուրքիայում մտցվում է ռազմական դրություն:

1:20
Բանակը գրավել է թուրքական TRT հեռուստաալիքը և դրա միջոցով հայտարարություն տարածել իշխանությունը վերցնելու մասին: 

1:18
Թուրքիայի պետական հեռուստաընկերությունը հայտնում է, որ այժմ երկիրը գտնվում է «խաղաղության խորհրդի» հսկողության տակ, որը կապահովի բնակչության անվտանգությունը։

Այն նաև հայտնում է, որ ժողովրդավարական և աշխարհիկ օրենքի գերակայությունը Էրդողանի կառավարության կողմից էռոզիայի է ենթարկվել։

1:12
The Telegraph-ը, որն անընդհատ իրադարձությունների թարմացումներ է կատարում, հայտնում է, որ զինվորականներն Անկարայում Թուրքիայի պետական հեռուստաընկերության՝  TRT-ի գլխավոր շենքում են։

1:07
Հունաստանը բանակը բերեց մարտական պատրաստության` Թուրքիայի դեպքերի հետ կապված:

1:05
Թուրքիայի արժույթը կտրուկ անկում է գրանցել։ Թուրքական լիրան նվազել է 3,8 տոկոսով դոլարի նկատմամբ։ «Թվիթերում» հաղորդում են, որ հերթեր են գոյացել և մարդիկ բանկոմատներից գումար են հանում։

1:00
«Ջումհուրիյեթը» գրում է, որ Էրդողանին հավատարիմ ուժերը նրան տեղափոխել են ապահով վայր:

00:57
Ստամբուլի Աթաթուրքի օդանավակայանից բոլոր չվերթները չեղյալ են հայտարարվել։ Այս մասին հայտնել է Reuters-ի ականատեսը՝ վկայակոչելով օդաչուի։ Չվերթները չեղարկվել են այն բանից հետո, երբ զինվորականները հայտարարել են, որ վերահսկողության տակ են վերցրել կառավարությունը։


00:43
Բանակը հայտարարեց, որ պահպանում է Թուրքիայի բոլոր միջազգային պարտավորությունները: 

00:40
Անկարայի քաղաքապետը կոչ է արել բնակչությանը դուրս գալ փողոց և դիմագրավել բանակին

00:35
Այս պահին Թուրքիայի զինված ուժերի գլխավոր շտաբը պաշտոնապես հայտարարեց. որ իշխանությունն իր ձեռքն է վերցնում:

00:18
Ռազմական ուղղաթիռը կրակ է բացել Անկարայի այն թաղամասում, որտեղ տեղակայված է Թուրքիայի ազգային հետախուզական կազմակերպության շտաբ գրասենյակը։

Ինչպես գրում է RT-ն, Թուրքիայի մայրաքաղաք Անկարայում հնչել են կրակոցներ, իսկ քաղաքի երկնքում պտտվում են ռազմական ինքնաթիռներն ու ուղղաթիռները։

Ըստ թվիթերյան հաղորդումների, իշխանությունները փակել են Ստամբուլի Բոսֆորի 2 կամուրջները, որտեղ ևս առկա են ռազմական ինքնաթիռներ։

Թուրքիայի օդուժի երկնքում հայտնվելու պատճառներն այս պահին հայտնի չեն։
RIA-Novosti-ն էլ հայտնել է, որ ֆեյսբուքն ու թվիթերը այսօր Անկարայում արգելափակված են եղել։  RIA-Novosti-ն նաև գրում է, որ Թուրքիայի վարչապետը հայտնել է, որ տեղի է ունեցել ռազմական հեղաշրջման փորձ։

Ըստ տեղական լրատվամիջոցների, անվտանգության աշխատակիցները հրատապ կանչվել են աշխատանքի։

Հայտնի է նաև, որ «Ֆեյսբուք», «Թվիթեր» սոցցանցերը և «Յութուբը» անջատած են Թուրքիայի տարածքում:

«Ռազմական խումբը, օգտվելով իրենց տրված լիազորություններից ու զենքից, փորձել են իրականացնել ապօրինի գործողություններ։ Սա այնքան էլ ճիշտ չէ հեղաշրջում անվանել, սակայն ամեն դեպքում, մեր քաղաքացիները թող հանգիստ լինեն, մենք կանենք ամեն ինչ` խաղաղության և կարգուկանոնի պահպանման համար։ Մեղավորները կկրեն ամենադաժան պատիժը»,-  RIA-Novosti-ի փոխացմամբ, այս մասին ասել է Թուրքիայի վարչապետ Բինալի Յըլդըրըմը՝ հեռախոսով  NTV հեռուստաընկերության եթերում։