Փոխոստիկանապետ. «Ժիրայր Սեֆիլյանը բանակցություններին չի մասնակցում»

Քաղաքական 19:19 17/07/2016 Հայաստան

Ոստիկանության և իրավապահ մարմինների հատուկ բոլոր ստորաբաժանումները բերված են մարտական վիճակի, սակայն նրանց հատուկ գործողություններ կատարելու ցուցում տրված չէ: Առայժմ ընթանում են բանակցություններ: Իրենց պահանջը չի փոխվել, նույնն է՝ ազատ արձակել Ժիրայր Սեֆիլյանին,- լրագրողների հետ ճեպազրույցում ասաց Հայաստանի փոխոստիկանապետ Հունան Պողոսյանը:

Պատասխանելով հարցին, թե արդյո՞ք բանակցություններին մասնակցում է Ժիրայր Սեֆիլյանը, քանի որ նման լուրեր են տարածվել, որ իրեն բերել են բանացելու, փոխոստիկանապետն ասաց, որ՝ ոչ, չեն բերել:

Հարցին, թե արդյո՞ք նման նպատակ կա, ասաց. «Առայժմ ոչ»:

Պողոսյանը նշեց, որ խմբի անդամները զինված են. «Իրենք տարածում են, որ ընդամենը վերցրել են գնդի զենքերը, սխալվում են, ի սկզբանե զինված հարձակում են գործել»:

Փոխոստիկանապետը կրկին անգամ հորդորեց հեռու մնալ սադրանքներից, հանցագործությունից, մարդասպանությունից, ավելորդ արյունահեղությունից:

Հ.Պողոսյանն ասաց, որ վիրավորները տեղափոխվել են հիվանդանոցներ, նաև սպանված գնդապետ Արթուր Վանոյանի դին: Վիրավորների թվում է նաև ոստիկանության օպերատոր: Ըստ նրա խոսքի՝ վիրավորներից երկուսի վիճակը ծայրահեղ ծանր է, երկուսի վիճակը՝ ծանր: Ստացել են հրազենային վնասվածքներ մարմնի տարբեր հատվածներում: Ա. Վանոյանը մահացել է հրազենային վնասվածքի հետևանքով հարձակման արդյունքում:

Նա չնշեց, թե զինված խումբը քանի հոգուց է կազմած: Իսկ ներսում պատանդները ոստիկանության վեց աշխատակից են:

Պատասխանելով հարցին, թե ինչպե՞ս է հաջողվել գրավել ՊՊԾ գունդը, Հ.Պողոսյանն ասաց. «Խաղաղ պայմաններում մեր ազգաբնակչության անդորրը պահող խաղաղ ոստիկանին մտնել սպանելով, ոստիկանի կողմից համարժեք պատասխան չստանալով»:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: