Ձեր վստահելի աղբյուրը

Հերթական «Ոսկե ծիրանն» ավարտեց իր աշխատանքները, բայց ոչ՝ առաքելությունը: Հայաստանում սիրված կինոփառատոնն իր երկրպագուներին  թողնում է իրենց մտորումների, ստացած տպավորությունների և վերլուծությունների ազատության մեջ՝ մինչև նոր հանդիպում: Որքանո՞վ հանդիսատեսը ներշնչվեց գեղեցիկ մտածելու, ապրելու և ստեղծելու ցանկությամբ՝ ցույց կտա ժամանակը: Աշխարհի առջև բաց պատուհան դարձած փառատոնը համամարդկային արժեքներ փոխանցող դեսպան է տարբեր մշակույթներով առաջնորդվող մի շարք ազգերի համար, - փառատոնի փակման արարողությանն ասել է արդեն տասը տարի փառատոնի գլխավոր գործընկեր ընկերության՝ ՎիվաՍել-ՄՏՍ-ի գլխավոր տնօրեն Ռալֆ Յիրիկյանը: Այս մասին հայտնում են ընկերության մամոիլի ծառայությունից: 

Մեկշաբաթյա կինոտոնի պաշտոնական փակումն ազդարարել են  «Ոսկե ծիրանի» հիմնադիր տնօրեն Հարություն Խաչատրյանն ու  Ռալֆ Յիրիկյանը: 

Հիշեցնենք, որ փառատոնը կայացել է հուլիս 10-17-ը: Համաշխարհային կինոարվեստի շունչը մեկ շաբաթ մայրաքաղաքում տարածած հերթական «Ոսկե ծիրանն» ինքնատիպ էր միջոցառումների բազմազանությամբ, ճանաչված կինոգործիչների, հյուրերի մասնակցությամբ և բազմաժանր ֆիլմերի ցուցադրությամբ:  

Փառատոնային շաբաթը հագեցած էր իրադարձություններով. Հայաստանի Հանրապետության անկախության 25-ամյակին նվիրված «Հայկական կինո. արդի ժամանակներ» ծրագրի իրականացում, ֆիլմերի ցուցադրություն, կլոր սեղան-քննարկումներ, վարպետության դասեր, որոնք անցկացրեցին Ֆրեդ Քելեմենը (Գերմանիա, ռեժիսոր/օպերատոր), Ժելիմիր Ժիլնիկը (Սերբիա, ռեժիսոր),Վիտալի Մանսկին (Ռուսաստան, ռեժիսոր), Հոմայուն Էրշադին (Իրան, դերասան) և Անդրեյ Լոշակը (Ռուսաստան, ռեժիսոր), Հայաստանի կինեմատոգրաֆիստների միության նախագահ, ռեժիսոր Ռուբեն Գևորգյանցին նվիրված երեկոյի անցկացում, ռեժիսորներ Ժելիմիր Ժիլնիկի և Ֆրեդ Քելեմենի ֆիլմերի հետահայաց ցուցադրություններ և այլն:

Փառատոնը նշանավորվել էր հայ-թուրքական կինոպլատֆորմի նախագծերի զարգացման հերթական աշխատաժողովի անցկացմամբ: Ռեժիսորներ Առնո Խայաջանյանը («Բարի գալուստ, Անատոլիա») և Իննա Սահակյանը («Ավրորայի արևածագը») պարգևատրվել են համապատասխանաբար՝ 7500 և 5000 ԱՄՆ դոլար մրցանակով:

Փառատոնն իր ներկայությամբ պատվել էր հանրահայտ դերասանուհի, մեծանուն ռեժիսորների ֆիլմերի աստղ Ժակլին Բիսեթը: Հանդիսատեսը  հանրահայտ երեք կինոնկար դիտեց նրա դերակատարմամբ:

13-րդ «Ոսկե ծիրան»-ը հարգանքի տուրք մատուցեց փառատոնի լավագույն բարեկամ, ճանաչված ռեժիսոր, երջանկահիշատակ Աբաս Քիառոսթամիի հիշատակին: 

«Ոսկե ծիրան» 13-րդ միջազգային կինոփառատոնը ներկայացրել էր նաև «Ֆրանսիական նոր կինո», «Գերմանական կինոյի օր», «Շեքսպիրն ապրում է կինոյում», «Լեհական կինոյի օր» ծրագրերը, որոնք իրականացվում էին ՀՀ-ում օտարերկրյա դեսպանությունների հետ համագործակցությամբ: Իսկ «Երևանյան պրեմիերաներ»-ի շրջանակում հանդիսատեսին ներկայացվել էին երբևէ մեծ էկրանին չցուցադրված ֆիլմեր: