Ձեր վստահելի աղբյուրը

«Անընդունելի է զենքով ու զինված ներքին հարցեր լուծելը: Անսպասելի էր, որ նրանք այդպիսի քայլի դիմեցին»,-  «Մեդիա կենտրոն»-ում «Զինված հարձակում Երևանում. զարգացումներ և հետևանքներ» թեմայով քննարկմանն ասաց Հայաստանի Հելսինկյան կոմիտեի նախագահ Ավետիք Իշխանյանը:

Նա նշեց, որ մի քանի ամիս առաջ, երբ  նրանք սկսեցին քաղաքացիական անհնազանդության իրենց շարժումը, «Հիմնադիր խորհրդարանի» փոխնախագահ Վարուժան Ավետիսյանն ասել է, որ երբեք չեն դիմելու ուժային գործողությունների, իրենց զենքը միայն քաղաքացիական անհնազանդությունն է, իրենք ուժային դաշտ չեն մտնելու:

«Չպետք է թույլ տալ նոր արյունահեղություն: Համբերություն է պետք: Հորդորել, պահանջել իշխանություններից ոչ մի դեպքում գրոհի չդիմել, ամենաերկարատև բանակցությունների գնալ, որպեսզի հանգուցալուծումը լինի խաղաղ, արդար դատավարության երաշխիքներ տալ նրանց»,- ասաց Ա.Իշխանյանը:

Քննարկմանը ներկա «Իրավունքի և ազատության կենտրոն» ՀԿ-ի ղեկավար, իրավապաշտպան Վարդան Հարությունյանն ասաց, որ քաղաքական գործիչն անկախ ամեն ինչից, չպետք է դիմի զենքի, արյունահեղության:

«Դատապարտելի է, անթույլատրելի»,- ընդգծեց նա:

Ըստ նրա, միանշանակ է, որ  գործընթացները մղվել են քրեական դաշտ մեծամասամբ իշխանությունների վարած գործողությունների, քաղաքականության արդյունքում:

«Քանի դեռ Հայաստանում իշխանության որակը, մտածողությունը, պետության մասին նրանց ունեցած պատերացումներն ու վերաբեմունքը չի փոխվել, բացառված չէ, որ այս կարգի խնդիրներ ծագեն»,- նշեց Վ. Հարությունյանը: 

Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցն ասաց, որ զինված խմբի ներկայացուցիչներին և ոստիկանության աշխատակիցներին չի տարանջատում, քանի որ երկուսն էլ զոհ են այն իրավիճակի, որ այսօր կա՝ իշխանության ձևավորած ոչ պատասխանատու քաղաքականության, այն անպատժելիության մթնոլորտի հետևանքով, որ տիրում է Հայաստանում: 

Միաժամանակ նա ընդգծեց, որ դատապարտում է բռնի մեթոդներով խնդրի լուծումները: Ստեղծված իրավիճակից, նրա խոսքով, պետք է դուրս գալ երկխոսության, բանակցությունների  ճանապարհով՝ զերծ մնալով հնարավոր մարդկային զոհերից:

«Կարևոր հանգամանք է, որ գիշերը ուժային մեթոդներ չեն կիրառվել, պատանդներ են ազատվել: Այս մոտեցումը պետք է պահպանվի: Մենք պետք է աջակցենք, ոչ թե հրահրենք, մեղավորեր փնտրենք»,- հավելեց Ա.Սաքունցը:

Քաղաքագետ Աղասի Ենոքյանն ասաց, որ այս դեպքերում տեսնում է արտաքին վեկտոր. «Ինչ է կատարվում տարածաշրջանում: Լավրովը Ալիևի հետ խոսեց այն մասին, որ մոտ են ղարաբաղյան հիմնախնդրի կարգավորմանը: Հայաստանը ոչ մի ձայն չհանեց: Հայաստանում քննարկումներ չեն գնացել: Այսինքն, իրենք պատկերացումներ ունեին, թե Հայաստանն ինչ վիճակում է հայտնվելու, որպեսզի կարողանան իրենց այդ պլանն իրագործել»:

Միաժամանակ նշեց, որ ունի լուրջ ներքին քաղաքական բաղադրիչ. «Քաղաքական դաշտն ամայացված է, չի մնացել ընդդիմադիր քաղաքական ուժ, որ գա իր իդեաներով ու փոփոխություններ մտցնի քաղաքական դաշտում: Եթե չունես սահմանադրական ճանապարհով փոփոխություններ անելու հնարավորություն, մնում է հակասահմանադրական այս տեռորիստական գործողությունը»:

Քաղաքագետը զինված խմբի անդամների պահանջները համարեց անհեթեթ, ոչ քաղաքական:

Քննարկմանը ներկա  ՀՀ ԱԺ «Ժառանգություն» խմբակցության պատգամավոր Թևան Պողոսյանն ասաց, որ մի բան պետք է գիտակցել՝  անօրինական մեթոդներով օրինական երկիր չեն կառուցում: Ըստ նրա,  պետք է բոլորը կոչ անեն բանակցությունների միջոցով զենքերը վայր դնել, հանձնվել, կրել  պատիժը:

«Սրա հետ միասին պետք է դասեր քաղենք՝ հասկանալու, թե ինչն է եղել խնդիրը, որ եկել հասել ենք այս իրավիճակին»:

Ըստ Թ.Պողոսյանի, Հայաստանում իսպառ բացակայում է արդյունքի հանդեպ պատասխանատվություն կրելու մշակույթը:

Խոսելով երեկվա ընթացքում բերման ենթարկվածների մասին, իրավապաշտպան Արտակ Զեյնալյանն ասաց.
«Այնպես ինչպես արձագանքում են Հայաստանի իշխանություններն այս երևույթին, որևէ առնչություն չունի Հայաստանի սահմանադրական կարգի հետ:  Սահմանադրական կարգն այլ բան է ենթադրում.  անձնական ազատության և անձեռնմխելիության իրավունքի միջամտության պարագայում պետք է պահպանված լինի օրենքով սահմանված կարգը: Մարդիկ  բերման են ենթարկվել, ակտիվիստներն ազատազրկվել են,  նպատակը եղել է ուղղակի  ազատությունից զրկումը: Դա քողարկված է եղել այլ պատրվակների տակ»:

Նրա կարծիքով, այս հարցում Ազգային ժողովը լուրջ անելիք ունի, պետք է ԱԺ արտահերթ նիստ գումարվի, լսումներ արվեն այս թեմայով, զեկուցեն, թե ինչ իրավական հիմքով են մարդկանց ազատությունից զրկում, ինչ պայմաններում են պահվում:

«Այն պատճառները, որոնք ներկայացվում են, պատրվակներ են, իրական պատճառը մարդկանց ֆիզիկապես մեկուսացնելն է, ինչը դատապարտելի է»,- նշեց իրավապաշտպանը:

Թևան Պողոսյանը համաձայնեց, որ այստեղ Ազգային ժողովն ունի դերակատարություն. «Միաժամանակ պետք է գիտակցել, երբ ասում ենք Ազգային ժողովը հավաքվի՝ ի՞նչ Ազգային ժողով է հավաքվելու, որտեղ գալու են մի հայտարարության տեքստ դնեն, մեծամասնությունը քվեարկի»:

Պատգամավորը նաև նշեց, որ խախտվել են մարդկանց իրավունքները՝ իրավապաշտպանները թող օգնեն այդ մարդկանց  դատական համակարգով լուծել այդ հարցերը:

«Ազգային ժողովը կարող է հիմնվելով այդ պրոբլեմներ վրա և օրենքի նախագիծը փոխի, ասի սխալ օրենք ենք գրել»,- ասաց նա՝  միաժամանակ վստահություն հայտնելով, որ լսումներ լինելու են, շատ պատգամավորներ այդ հարցադրումներն էլ անելու են: