Ձեր վստահելի աղբյուրը

«Երկրորդ օրն էր, որ առանց պատճառաբանության բերման ենթարկեցին», -այսօր Խորենացի փողոցում լրագրողների հետ զրույցում ասաց ակտիվիստ Դավիթ Սանասարյանը:

Նրա ներկայացմամբ, երեկ Ազատության հրապարակում, երբ լրագրողներին հարցազրույց է տվել, մի քանի կարմիրբերետավորներ մոտեցել են ու ուժով տարել ոստիկանական մեքենա:

«Երբ լրագրողներին խնդրում էի քաղաքացիներին ասեն փողոց դուրս գալ, կարմիրբերետավորներից մեկը հարվածեց դեմքիս, աչքերիցս կայծ թռավ: Դուռը փակեցին ու ինձ և երկու ընկերներիս՝ Անդրանիկ Ասլանյանին և Արթուր Սարգսյանին, սկսեցին դաժանաբար հարվածել: Սա աննախադեպ էր:

Ձեռնաշղթաները սեղմած հագցրել էին ու անմարդկային ձևով ծեծում էին բոլորիս: Մոտ 15 անգամ միայն գլխիս եմ հարված ստացել: Ու արդյունքում բժիշկները ախտորոշեցին ուղեղի ցնցում: Երբ հասանք տեղ, ինձ քարշ տալով հանեցին, գցեցին դուրս և կրունկով ուղղակիորեն խփեցին գլխիս: Ամբողջ ընթացքում հայհոյում էին», -ներկայացրեց Սանասարյանը:

Նրա խոսքով, երբ ընկերները տեսել են ուշագնաց է եղել, փորձել են օգնել, բայց ոստիկանները թույլ չեն տվել՝ ասելով, թե «դերասանություն» է անում: 

«Ջուր են լցրել վրաս՝ ծաղրելով: Շտապօգնություն կանչեցին ու բժիշկը ասաց, որ պետք է տեղափոխել հիվանդանոց», -նշեց Սանասարյանը՝ խոսելով նվաստացումների մասին, Սանասարյանը պատմեց.

«Կարմիրբերետավորներից մեկը, որին դեմքով ճանաչում եմ, հայտարարեց՝ իջացրեք բածինկեքը, թող լպստի: Նման բան տեղի չունեցավ, բայց հայտարարություն արվեց: Մի բան էլ եղավ, որի մասին ես չէի ուզի խոսել, բայց ընկերս արդեն հայտարարել է, իմ ձեռնաշղթայված վիճակում, ուղղակի թքեց վրաս: Սա էսպես չենք թողելու»:

Նշենք, որ Մարդու իրավունքների պաշտպան Արման Թաթոյանը գրություններ է ուղարկել ՀՀ հատուկ քննչական ծառայություն՝ Քրեական դատավարության օրենսգրքով սահմանված ընթացակարգ նախաձեռնելու հարցը լուծելու նպատակով: Այդ հաղորդումների թվում են Դավիթ Սանասարյանի, Վաղինակ Շուշանյանի և մի շարք այլ քաղաքացիների հաղորդումները: