Ձեր վստահելի աղբյուրը

Beeline-ի հովանավորությամբ  հուլիսի 15-17-ը Գեղարքունիքի մարզի Շորժա համայնքի մոտ գտնվող «Վիշապ» լողափում «Սիվիլ Արտ» մշակութային հասարակական կազմակերպությունն անցկացրել է «Հուսո առագաստ 2016» հեղինակային երգի համահայկական երկրորդ փառատոնը։ 

«ԱրմենՏել» ՓԲԸ հասարակայնության հետ կապերի ծառայության փոխանցմամբ՝ փառատոնը նպատակ ունի  բացահայտել ասպարեզում նորանուն հեղինակ-կատարողների, բեմ տրամադրել և նպաստել նրանց ստեղծագործական առաջընթացին։ Փառատոնի շրջանակում հանդես են եկել ինչպես հայտնի, այնպես էլ նորահայտ հեղինակային երգի կատարողներ: Տեղի են ունեցել նաև «Արվեստանոցային հանդիպումներ» երիտասարդ և փորձառու կատարողների միջև, համերգային փոքրիկ ծրագրեր սիրված երգահանների մասնակցությամբ և մշակութային միջանկյալ հանդիպումներ:

Փառատոնի ընթացքում շնորհակալագիր է հանձնվել Հայաստանում Beeline-ի Գլխավոր տնօրեն Անդրեյ Պյատախինին՝ «Հուսո առագաստ-2016» հեղինակային երգի համահայկական փառատոնին աջակցելու համար։

«Beeline-ի կորպորատիվ սոցիալական ռազմավարության շրջանակում մենք կարևորում ենք այն միջոցառումները, որոնք ուղղված են հատկապես երիտասարդների համար նոր հեռանկարների ստեղծմանը և նրանց կյանքն ավելի լավը դարձնելուն: Ուրախ  ենք, որ ականատեսն եղանք  երիտասարդ հեղինակ-կատարողների ելույթներին և հանդիպեցինք այնպիսի տաղանդավոր երիտասարդների, ովքեր կզարգացնեն երաժշտական այս ուղղությունը Հայաստանում», - նշել է Հայաստանում Beeline-ի Գլխավոր տնօրեն Անդրեյ Պյատախինը:

«Փառատոնին մասնակից երիտասարդների հիմնական մասը հնարավորություն ունեցավ իր տաղանդը հասարակության ավելի լայն շրջանակներում  բացահայտելու, հեղինակային երգի ասպարեզում նոր ճանապարհ ընտրելու  և  գնահատվելու՝ շնորհիվ Հայաստանում   Beeline-ին և մյուս աջակիցների, ինչի համար  իմ և նրանց անունից շնորհակալություն եմ հայտնում։ Նման աջակցություններն ուղղակիորեն խթանում են հայ հեղինակային երգի նոր սերնդի  ստեղծագործական ուղին  առաջ տանելու, տաղանդաշատ երիտասարդների բացահայտելու և դրանով իսկ նպաստում Հայաստանում հեղինակային երգի զարգացման, տարածման կարևոր գործին», - նշել է «Սիվիլ Արտ» մշակութային Հասարակական կազմակերպության տնօրեն Վախթանգ Հարությունյանը:

«Հուսո առագաստ 2016» համահայկական երկրորդ փառատոնի անցկացմանն աջակցում են ՀՀ Մշակույթի նախարարությունը և «Բարդերի ակումբ» ստեղծագործական միավորումը: Փառատոնի գլխավոր հովանավորն է Beeline-ը։