Ձեր վստահելի աղբյուրը

«Քաղաքական, կուսակցական հողի վրա շատերն ունեն ծայրահեղ գաղափարներ, այդ գաղափարներն իրագործելու միջոցների տարբեր չափանիշներ: Հասարակության մեջ կան հասունացած խնդիրներ, դժգոհություններ: Հասարակության մեջ դեր խաղալու ցանկություն կա: Այս ամենը զուգուրդվում է  ինչ-որ գործողություններով՝ ցույցեր, ակցիաներ կամ վերջին դեպքը՝ ծայրահեղ միջոց, որն արդեն բնութագրվում է  ահաբեկչություն»,- լրագրողների հետ հանդիպման ժամանակ նման կարծիք հայտնեց Հայաստանի Գրողների միության նախագահ Էդուարդ Միլիտոնյանը:

Ըստ նրա, աշխարհում կան արարքներ, որոնք աշխարհը գնահատում է բացասական, սակայն հայերը նմանատիպ արարքները գնահատում են դրական, հայրենասիրական:

«Աշխարհին ասել, որ մենք որևէ քաղաքական կամ հայրենասիրական գործ պետք է ահաբեկչությամբ լուծենք, դա չի ընկալվելու: Աշխարհն ունի որոշ հարցերի հանդեպ, հատկապես ահաբեկչության, միակերպ գնահատական: Մենք պետք է կարողանանք աշխարհի հետ միաքայլ գնալու ռիթմ ունենալ, ոչ թե մեզ համար մշակել երկակի ստանդարտներ՝ մեր ահաբեկչությունը սկսենք գովել,  մերը հայրենասիրական, գաղափարախոսական ահաբեկչություն է,  այլոց ահաբեկչությունը համարել ահաբեկչություն: Ագրեսիաներն արդարացնելը մեծ չարիք է մեր ապագայի համար»,- ասաց Է.Միլիտոնյանը՝ ընդգծելով, որ  խնդիրները պետք է լուծել օրենքի սահմաններում, խելամիտ:

«Այն ընկերները, ովքեր գրավել են պարեկապահակային ծառայության շենքը, լինեն խելամիտ, հանձնեն զենքերը՝ չվտանգելով իրենց, ուրիշների կյանքը»,- ասաց նա՝ հորդորելով  զինված խմբի անդամներին վերադառնալ խելամտության դաշտ,  իշխանություններին՝ շարունակել բանակցությունները, որպեսզի սպանություններ չլինեն:

Է.Միլիտոնյանի խոսքով, այս ամենը նաև վատ է ընկալվելու աշխարհի կողմից: