Ձեր վստահելի աղբյուրը

Հայաստանում քաղաքական փոփոխություններ կատարելու համար բռնությունը երբեք ընդունելի տարբերակ չի կարող լինել: Այս մասին այսօր լրագրողների հետ զրույցում ասաց Հայաստանում ԱՄՆ դեսպան  Ռիչարդ Միլսը՝ անդրադառնալով Ոստիկանության ՊՊԾ գնդում ստեղծված իրավիճակին:

Դեսպանը նախ իր ցավակցությունը հայտնեց զոհված սպայի՝ գնդապետ Արթուր Վանոյանի մաhվան կապակցությամբ և ավելացրեց, որ ԱՄՆ դեսպանությունն ուշադիր հետևում է իրավիճակին, քանի որ դեսպանության հիմնական խնդիրներից մեկն է՝  Ամերիկայի քաղաքացիներին իրազեկել  երկրում անվտանգության և ապահովության հետ կապված հարցերը: «Առայժմ մենք շարունակում ենք ամերիկացիներին հորդորել Էրեբունու տարածքից հեռու մնալ, քանի դեռ իրավիճակը չի կարգավորվել»,- ասաց Ռիչարդ Միլսը: 

Հարցին, թե  արդյոք ստեղծված իրավիճակի հետ կապված ԱՄՆ-ն իր աջակցությունն է առաջարկել ՀՀ իշխանություններին, դեսպանը պատասխանեց. «Ես Հայաստանի իշխանությունների հետ ուղղակի կապի մեջ կիրակի օրվանից հետո չեմ եղել, բայց երեկ պետքարտուղարությունում այս մասին հարց բարձրացվեց, և մեր կողմից ՀՀ  կառավարությանը հորդորեցին՝  իրավիճակը  կարգավորել զսպվածությամբ և արհեստավարժ կերպով»:

Այնուհետև Ռիչարդ Միլսը ավելացրեց.  «Ժամանակն է, որպեսզի  բոլոր հայերի կողմից իրավունքի գերակայության նկատմամբ հարգանք դրսևրովի, որպեսզի իրավիճակը խաղաղ հանգուցալուծվի, ինչը, կարծում եմ, այն է, ինչ բոլորն են ցանկանում»: