Ձեր վստահելի աղբյուրը

ՀՀ առողջապահության նախարար Արմեն Մուրադյանն այսօր կառավարության նիստից հետո անդրադառնալով Խորենացի փողոցում  տեղի ունեցած միջադեպի հետևանքով վնասվածքներ ստացած քաղաքացիների վիճակին, նշեց,  որ առավոտյան ժամը 9-ի դրությամբ բուժհաստատություններ դիմել է շուրջ 51 քաղաքացի, որից 29-ը՝ ոստիկաններ։

«Բոլորին ցուցաբերվել է ժամանակին և պատշաճ բուժօգնություն։ Այս պահին ծայրահեղ ծանր կամ կյանքին վտանգ սպառնացող դեպքեր չունենք»,- ասաց Արմեն Մուրադյանը։

Խոսելով հուլիսի 17-ին ՊՊԾ գնդի տարածքում վիրավորվածների առողջական վիճակի մասին՝  առողջապահության նախարարը նշեց, որ ծանր էր ոստիկան Գագիկ Մկրտչյանի վիճակը,  բայց այսօր դրական միտում կա, և հնարավոր է՝ օրվա ընթացքում անջատվի արհեստական շնչառության ապարատը։

Անդրադառնալով զինված խմբի անդամներից մեկի հայտարարությանը, ըստ որի` իրենք զրկվել են շտապօգնության ծառայությունից օգտվելու հնարավորությունից` Արմեն Մուրադյանն ասաց, որ շտապօգնության մեքենաները տվյալ տարածքում են և անհրաժեշտության դեպքում բուժօգնություն կտրամադրվի:  «Եթե անհրաժեշտություն լինի, շտապօգնությունը կարող է օգնություն ցույց տալ:   Կարող եմ միանշանակ ասել հետևյալը` բուժօգնություն որևէ մեկին անհասանելի չի լինի անհրաժեշտության դեպքում»:

Լրագրողներից մեկն էլ հետաքրքրվեց, թե ինչ վիճակում է գտնվում զինված խմբի անդամներից մեկի հղի կինը, նախարարը պատասխանեց. «Առանձնահատուկ տեղեկություն` կապված որևէ մեկի կնոջ հետ, չունեմ, բայց կարող եմ վստահեցնել, որ բոլոր հղիները գտնվում են խիստ ուշադրության ներքո` անկախ նրանից, թե ում կինն են»: