Ձեր վստահելի աղբյուրը

«Աբսուրդ է՝ հայը հային պատանդ է վերցնում՝ հանուն հայի փրկության»,- լրագրողների հետ հանդիպման ժամանակ ասաց Կոմպոզիտորների միության նախագահ Արամ Սաթյանը՝ խոսելով «Սասնա ծռեր» զինված խմբի  կողմից ոստիկանության ՊՊԾ գնդի վրա հարձակման ու ոստիկաններին պատանդ պահելու մասին:

Միաժամանակ նա նշեց, որ Հայաստանում ժամանակ առ ժամանակ նման պոռթկումներ են լինում, խոսակցություններ:

«Եթե դա կանխվեր ժամանակին, որոշ գործողություններ արվեին… Չինովնիկների վերաբերմունքը դեպի հասարակ ժողովուրդը պետք է փոխվի: Բայց ես չեմ գտնում, որ այս քայլն այդ ճանապարհներից մեկն է:  Պետք է լինել հանդուրժող, ներողամիտ իրար նկատմամբ»,- ասաց կոմպոզիտորը:

Ասուլիսին ներկա Ճարտարապետների միության նախագահ Մկրտիչ Մինասյանը  նշեց, որ երկրում անընդհատ կրկնվող դժգոհություններն ինչ-որ բան ասում են, իշխանությունները պետք է դրանից հետևություններ անեն, այսպես չի կարելի շարունակել:

«Տղաները, ովքեր գտնվում են ներսում, նրանց նկատմամբ պետք է արդար լուծում լինի, միաժամանակ մեծ հույսեր ունեմ, որ այս վիճակից դուրս կգանք առանց արյունահեղության: Բայց դրանից հետո պետք է մի բան փոխվի: Անընդհետ նման դեպքեր են կրկնվում, հարցերը չեն լուծվում, այսինքն՝ գերատեսչությունները չեն անում իրենց գործը, մարդկանց հետ չեն խոսում, ինչպես կարելի է մարդկանց ցինիզմով պատասխանել: Այս ամենը կուտակվում ու դժգոհության ալիք է բարձրանում»,- ասաց նա՝ ընդգծելով, որ հարցը պետք է խաղաղ լուծում ստանա, այլապես եթե արյունահեղություն լինի,  Հայաստանի համար դժվարին ժամանակներ կսկսվեն: 

Ժուռնալիստների միության նախագահ Աստղիկ Գևորգյանն ասաց, որ բողոքներ միշտ էլ կան, մտավորականներն էլ ունեն, բայց պետք է ընտրել երկխոսության, զրուցելու ճանապարհը:

«Մենք այլևս զրկված ենք մի կաթիլ արյուն թափելու բարոյական իրավունքից: Ամեն նման պարագայում մեր երկիրը տաս տարով հետ է գնում»,- նշեց նա՝ հավելելով, որ հայ ժողովուրդը սիրում է հպարտանալ իր պատմությամբ, բայց չի սիրում այդ պատմությունից դասեր քաղել: 

«Մեր ժողովրդին հարիր չէ պատանդ բառը: Մեզ հետ կապ չունի այդ բառը: Ցանկանում եմ, որ էյֆորիկ վիճակում գտնվող մեր փառավոր ազատամարտիկները, որոնցով հպարտացել ենք, փառաբանել ենք,  սթափվեն, ողջամիտ լինեն, մտածեն՝ ինչու են պատանդ վերցնողի անուն վաստակում, իրենց չի սազում,  ո՞ւմ են պատանդ վերցնում՝ իրենց ազգակիցներին, եղբայրներին»,- ասաց նա:

Գրողների միության նախագահ Էդվարդ Միլիտոնյանը նույնպես նշեց, որ հարցը պետք է խաղաղ հանգուցալուծում ունենա, այլապես երկիրը կտանի դրամատիկ, ցավալի իրադարձությունների:

Կինեմատոգրաֆիստների միության նախագահ Ռուբեն Գևորգյանցի խոսքով,  պաշտոնյաները պետք է պարտադիր մի ձև, մեխանիզմ գտնեն ու հարցը լուծեն,  միաժամանկ ընդգծեց. «Մենք  կարող ենք միայն մեր թշնամու՝ թուրքի արյուն թափել»:

«Համոզված եմ, ոստիկանությունն էլ չի ուզում ընկնի այդ պատմության մեջ: Բայց հիմա բախում է գնում, որը ձեռք է տալիս միայն մեր թշնամիներին: Այս ամենը տեղի ունեցավ թուրքական բախումներից մի երկու օր անց: Կարծես սցենարը գրված լինի մեկ ուրիշ տեղ: Չնայած «Սասնա ծռեր» խմբի տղաներն ազնիվ են»,- ասաց նա:

Ռ.Գևորգյանցը ստեղծված վիճակից դուրս գալու մի քանի ելքեր է տեսնում, բայց, ըստ նրա, առաջինը՝ ազատ արձակել Ժիրայր Սեֆիլյանին:

«Բայց նրանք նորանոր առաջարկություններ են անում, ինչն արդեն ջրհեղեղի է նման լինում: Պետք է բանակցեն նրանց հետ մարդիկ, ովքեր մաքուր են՝ Վազգեն Մանուկյան, Կոմանդոս, Վիտալի Բալասանյան, ֆիդայիններ»,- նշեց  Կինեմատոգրաֆիստների միության նախագահը:

Խոսելով ՊՊԾ գնդի տարածքում հավաքված քաղաքացների մասին, Ռ. Գևորգյանցն ասաց, որ նրանց մեջ շատ են սադրիչները՝ տարբեր տեղերից:

«Հայաստանը լեցուն է շպիոններով, տարբեր երկրներից լցված են, ինչ ասես անում են: Ամբողջ Հայաստանը սադրանքի մեջ է, այս հողակտորն են ուզում վերցնել: Մեր ղեկավարներն այդքանն իմանալով՝ պետք է ժողովրդի հետ լինեն, ձեռք մեկնեն ժողովրդին»,- նշեց նա:

Պատասխանելով հարցին, թե արդյո՞ք ճիշտ չէ, որպեսզի մտավորականները  խաղաղության կոչերով գնան և դիմեն այդ մարդկանց հենց տեղում,  Ռ.Գևորգյանցն ասաց, որ դա թատրոնի կլինի: Մկրտիչ Մինասյանը հավելեց, որ այնտեղ հավաքվածներից ոչ բոլորն են ճանաչում մտավորականներին, չեն լսի մտավորականի խոսքը. «Այնտեղ բոլորովին այլ մթնոլորտ է: Երբ խոսես վատ բաների մասին, քեզ կլսեն, հենց մի քիչ չափավոր բաներ ասես, չեն լսի: Ամբոխն իր կանոններն ունի»:

Նկարիչների միության նախագահ Կարեն Աղամյանի խոսքով, պետք է հանդարտացնել մարդկանց, ոչ թե հրահրել, մինչդեռ կան մարդիկ, ովքեր ավելի են սրում իրավիճակը:

«Երկկողմանի եմ սա ասում: Զարմանալի է, թե ինչու ոստիկանությունը սկսեց  ուժ կիրառել, չնայած իրավունք ունի, երբ իր վրա հարձակվում են:  Ցավալին այն է, որ ոստիկանների վրա քարեր են նետում: Նրանք էլ են հայ»,- ասաց  նա:

Նշենք, որ Հայաստանի ստեղծագործական միությունների նախագահների խորհուրդը նաև հայտարարություն է տարածել` հորդորելով ողջ ժողովրդին համախմբվել, լրջորեն խորհել ժողովրդի համար բախտորոշ ժամանակում ծառացած խնդիրները շուտափույթ  և միայն անարյուն ճանապարհով լուծելու  մասին: