Ձեր վստահելի աղբյուրը

««Սասնա ծռեր» խմբի տղաներին  համարում եմ հայրենասեր և զարմանում եմ, որ   ոմանք, այդ թվում՝ որոշ մտավորականներ,  նրանց անվանում են ահաբեկիչ»,- այս մասին այսօր լրագրողների հետ հանդիպման ժամանակ ասաց քանդակագործ Լևոն Թոքմաջյանը՝ անդրադառնալով հուլիսի 17-ին ՊՊԾ գնդի տարածք մուտք գործած «Սասնա ծռեր» խմբի անդամների գործողություններին:

Անդրադառնալով Նիկոլ Փաշինյանի հայտարարությանը, թե չի գնալու Խորենացի փողոց, Լևոն Թոքմաջյանը նշեց, որ ինքը հարգում է Փաշինյանին, բայց զարմացած է, որ Նիկոլ Փաշինյանը նեղացել է և այլևս այնտեղ չի գնալու:

«Զարմանալի բան է՝ ինչից ես նեղացել, եթե դու համոզված ես, որ գնացել ես այնտեղ որպես միջնորդ ժողովրդի և ոստիկանության միջև, գնացել ես, որպեսզի արյուն չթափվի, զոհեր չլինեն, ինչից ես նեղանում:  Մենք բոլորս պատասխանատու ենք ամեն ինչի համար»,- ասաց քանդակագործը:

Նա նաև անդրադարձավ Շարմազանովի այն հայտարարությունը, թե  միայն բանակցությունների ճանապարհով պետք է  հասնել իրավիճակի հանգուցալուծմանը, հիմա  խաղաղության մասին պետք է մտածենք.  «Լավ, շատ գովելի է, բայց ի՞նչ թեմայի շուրջ բանակցեք: Ես կարծում եմ՝ ամենալավ բանաձևը կլինի Սեֆիլյանին ազատ արձակելը։ Օրինակ, ինչո՞ւ բռնեցին Սեֆիլյանին, ի՞նչ էր արել։ Մի հատ ատրճանակ ուներ, էն էլ իրանք են տվել՝ որպես գնդի հրամանատարի»:

Լևոն Թոքմաջյանը «Սասնա ծռեր» ջոկատի տղաների արածը բնորոշեց որպես հոգու ճիչ:

Երգահան Լիլիթ Պիոպոյանն էլ նկատեց, որ «Սասնա ծռեր» խմբի անդամներն իրենց կյանքի գնով հարց են բարձրացրել:

«Մենք բոլորս էլ հասկանում ենք, որ ինչպես էլ հարցը լուծվի՝ իրենք զոհ են գնալու, իրենք մահապարտի նման նստել են, կյանքի գնով հարց են բարձրացրել և պետք է այդ հարցը լսվի՞, թե՞ ոչ: Ես գտնում եմ,  որ ոչ մի սարսափելի բան չի լինի, իշխանությունների վարկանիշը չի իջնի, եթե գնան բանակցությունների, որոշ զիջումների»,- նշեց Լիլիթ Պիպոյանը:

«Բողոքում են շատերը, գործում՝  քչերը: Եւ քչերից են այդ տղաները, որոնց պարտական ենք միայն նրա համար, որ հիմա ունենք Արցախ»,-իր խոսքն այսպես սկսեց դերասանուհի Լալա Մնացականյանը:

«Տեսեք, Պավլիկը իր հետ տարել է իր տղային, բայց որ մեկս մեզ հետ մեր երեխային կտանեինք: Եթե դու քո զավակին տանում ես քեզ հետ՝ նշանակում է, որ դու այլևս ոչ մի ելք չես տեսնում»,- նշեց  Լալա Մնացականյանը՝  հավելելով, որ իր համար անհասկանալի է իշխանությունների լռությունը:

Բանախոսները կարծում են, որ տղաների այդ  քայլը կապված է նաև ազատագրված տարածքներ հանձնելու հետ։

«Եթե մի թիզ հող հանձնենք, ապա ամբողջը կհանձնենք։ Արցախը հանձնել՝ նշանակում է հանձնել Հայաստանը»,- ասացին նրանք:

Իսկ այս իրավիճակից դուրս գալու միակ ելքը, ըստ նրանց,  բանակցություններն են ու ճիշտ որոշումներ կայացնելը: