Ձեր վստահելի աղբյուրը

Առաջիկա 5 օրերին հանրապետության տարածքը հիմնականում կգտնվի Սև ծովից ներթափանցող սառը օդային հոսանքների ազդեցության գոտում, որոնք մեր տարածաշրջանում կգործեն մինչև հուլիսի 30-ը ներառյալ: Panorama.am-ին կանխատեսումը տրամադրեց ԱԻՆ «Հիդրոմետ» ծառայության օդերևութաբանական կենտրոնի պետի տեղակալ Գագիկ Սուրենյանը:

«Այսօր Սյունիքում և Արցախում  անձրևները կշարունակվեն, մյուս մարզերում հիմնականում կգերակշռի առանց տեղումների եղանակ, հուլիսի 26-ին հանրապետության ողջ տարածքում տեղումներ չեն լինի, իսկ հուլիսի 27-30-ին հիմնականում Շիրակում, Լոռիում, Տավուշում, Արագածոտնի և Կոտայքի Լեռնային բնակավայրերում, Գեղարքունիքում,  Սյունիքում և Արցախում հատկապես կեսօրից հետո սպասվում է անձրև և ամպրոպ»,-նշեց նա:

Ծառայության կամխատեսման համաձայն, Արագածոտնի նախալեռներում, Արարատում, Արմավիրում և Վայող Ձորում կարճատև անձրևների փոքր հավանականություն կա միայն հուլիսի 29-30-ին:

«Ինչ վերաբերում է օդի ջերմային ֆոնին, պետք է նշեմ, որ այն զգալիորեն նվազել է, այսօր Երևանում ջերմաստիճանը չի գերազանցի +33...+34 աստիճանը, առաջիկա 5 օրերին ջերմաստիճանը էական փոփոխություններ չի կրի այսինքն համեմատաբար զով եղանակը կպահպանվի մինչև հուլիսի 30-ը ներառյալ: Օդի ջերմաստիճանը հատկապես ցածր կլինի Լոռիում, Տավուշում, Սյունիքում և Արցախում, քանի որ այս հատվածների վրա սառը օդային զանգվածների ազդեցությունը ավելի ընդգծվար կարտահայտվի»,-ասաց նա: