Ձեր վստահելի աղբյուրը

«Այն, ինչ այսօր տեղի է ունենում Երևանում՝ արդյունք է 90-ականների կեսից վարվող քաղաքականության, երբ կուտակվեցին սոցիալ-քաղաքական, տնտեսական և բարոյական խնդիրներ»,-այսօր լրագրողների հետ հանդիպմանը նման դիտարկում արեց «Մոդուս վիվենդի» կենտրոնի ղեկավար Արա Պապյանը:

«Մեզ մոտ եղավ  «Քամի ցանես, փոթորիկ կհնձես տարբերակը»: Սա խորագույն ճգնաժամ է, մեր անկախության տարիներին ամենամեծ ներքաղաքական ճգնաժամը»,-նշեց Պապյանը:

Նրա խոսքով՝ «Սասնա ծռեր» խմբի անդամներին իշխանությունները պետք է համարժեք պատասխան տան, այսինքն՝ ազատության դեմ ազատություն. «Իշխանությունը պետք է ընդառաջ քայլ անի: Զրկելով խմբի անդամներին սննդից և բուժօգնությունից` ևս գրոհի մի տեսակ է: Եթե ուզում ենք չխորացնել ճգնաժամային վիճակը, առաջինը՝ պիտի խուսափենք արյունահեղությունից, քանի որ արյունը կծնի արյուն: Երկրորդը իշխանությունը պիտի արդեն իսկ փոփոխություններ կատարի, քանի որ իշխանությունը մեզնից լավ գիտի, ովքեր են ավելի կոռումպացված չինովնրկները և որպես առաջին քայլ թող նրանց պաշտոնանկ անեն և քրեական գործ հարուցեն նրանց դեմ: Այս քայլերը եթե կատարվի, իրավիճակն ավելի կմեղմվի հետո հնարավորություն կլինի ավելի ավելի մեղմ մթնոլորտում բանակցել ավելի սկզբունքային հարցերի շուրջ»:

Լրագրողները հետաքրքրվեցին, թե արդյոք նա չի ցանկանում միանալ Խորենացիում համակարգող խմբին՝ Պապյանը պատասխանեց. «Իմ բնույթից ելնելով չեմ կարող կազմակերպչական գործն անել և ասել այնպիսի բառեր, որպեսզի բոլորի ականջին հաճո լինի: Ես պետք է կատարեմ վերլուծություններ, որոնք վստահ եմ, ոչ բոլորին դուր կգան: Ներկայիս կոորդինացիոն խումբը շատ լավ է կատարում միտինգի վարումը»: 

Ինչ վերաբերում է դրսի մեկնաբանություններին՝ «Մոդուս վիվենդի» կենտրոնի ղեկավարն ասաց. «Մի սկզբունքային դիրքորոշում կա, որ մենք պետք է պահպանենք: Ոչ Մոսկվայի, ոչ Վաշինգթոնի, ոչ Փարիզի գործը չէ, ցավալի է, որ շատ երկրների մայրաքաղաքներում իրենց իրավունք են վերապահում մեր ներքին հարցերի վերաբերյալ այնպիսի հայտարարություններ անել, որոնք միջպետական պրակտիկայում գրեթե ընդունված չեն: Օրինակ, Ռուսաստանի արտգործնախարարության խոսնակը մեկանաբնում է Եվրամիության դեսպանատների հայտարարությունները՝ մեր երկրի ներքին իրադարձության վերաբերյալ: Իրեն չվերաբերող հարց է, մեր և Եվրամիության խնդիրն է, իսկ իրենք դա մեկնաբանում են: Հերթական սխալն արեց մեր արտգործնախարարությունը, որը պաշտոնապես չբողոքեց Զախարովայի հայտարարությունը՝ ասելով, քիթդ մի մտցրու մեր ներքին գործերի մեջ: Մենք ինչպես չենք միջամտում ձեր ներքին գործերին, այնպես էլ դուք մի միջամտեք:

Հանդիպմանը ներկա քաղաքագետ Հայկ Մարտիրոսյանի խոսքով էլ՝ դատելով, ներկայիս վարքագծից, ակնհայտ է դառնում, որ քաղվել են միայն վնասակար դասեր:

«Պետք է իշխանությունը հասկանա, որ պետք է գնա զիջումների, քանի որ դրան գնալը նման պարագայում խելքի և ուժի նշան է: Այսօր ընտրություն ունի իշխանությունը և այս պարագայում գնդակն իրենց դաշտում է: Մենք լսում ենք խոսքեր, որոնցից պետք է ենթադրություններ, հետևություններ անենք, բայց իշխանությունները չեն բացահայտում, թե ինչ ենթադրությունների ու հետևությունների մասին է խոսքը»,-հավելեց նա: