«Ոչ մի ոստիկանական մեքենա չի անցնելու այստեղով, տվեք, ջարդեք». իրավիճակը Խորենացիում

Հասարակություն 09:44 26/07/2016 Հայաստան

Երևանի Խորենացի փողոցի վրա գտնվող ՀՀ ոստիկանության պարեկապահակետային գնդի տարածքում հավաքված քաղաքացիները ցանկանում են ԱԺ «Ժառանգություն» խմբակցության անդամ Զարուհի Փոստանջյանի միջոցով սնունդ փոխանցել գնդի ներսում գտնվող զինված խմբի անդամներին: Ոստիկաններից մեկը ասաց, որ այստեղից ոչ մի բան չի մտնելու:

Հավաքվածներից մեկը բղավեց, թե այստեղից ոչ մի տեղ չեն գնալու. «Ոչ մի ոստիկանական մեքենա չի անցնելու այստեղով, տվեք, ջարդեք»:

«Ժառանգության» փոխնախագահ Արմեն Մարտիրոսյանն ասաց, որ ճամփա փակել չկա, ինքնագործունեությամբ մի զբաղվեք:

«Ժողովուրդն է որոշում, դուք որոշում մի կայացրեք»,- Ա. Մարտիրոսյանի խոսքին պատասխանեց ակտիվ քաղաքացին:

Երեկ «Նոր Հայաստան» շարժման անդամ Ալեք Ենիգոմշյանը հայտարարել էր, որ արդեն մի քանի օր է «Սասնա ծռեր» խմբի անդամները սնունդ չունեն, ինչպես նաև ջուր, հոսանք, հեռախոսային կապ:

Զարուհի Փոստանջյանը դիմել է ՀՀ իշխանություններին՝ թույլ տալ իրեն սնունդ փոխանցել ոստիկանության ՊՊԾ գնդում գտնվող «Սասնա ծռեր» խմբի անդամներին:

Հիշեցնենք, որ հուլիսի 17-ին մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահում են այնտեղ գտնվող անձանց: Վերջին չորս պատանդ ոստիկանին նրանք ազատ էին արձակել հուլիսի 23-ին: «Սասնա ծռեր» խումբը պահանջում են արձակել մոտ մեկ ամիս առաջ մի խումբ անձանց կողմից ապօրինի կերպով զենք և ռազմամթերք ձեռ բերելը, փոխադրելը և պահելը կազմակերպելու մեղադրանքով կալանավորված Ժիրայր Սեֆիլյանին:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: