Սահմանամերձ Կողբ գյուղում Թումո կբացվի
Այսօր Թումո ստեղծարար տեխնոլոգիաների կենտրոնն ու «Կողբ» կրթության, մշակույթի և սպորտի զարգացման հիմնադրամը կնքել են Փոխըմբռնման հուշագիր Տավուշի մարզի` սահմանամերձ Կողբ գյուղում Թումո կենտրոն բացելու մասին:
Նախաձեռնությունը իրականություն կդառնա «Կողբ» կրթության, մշակույթի և սպորտի զարգացման հիմնադրամի և Սիմոնյան կրթական հիմնադրամի համագործակցության, ինչպես նաև արգենտինահայ բարերարներ Պողոս Էքսերցեանի, Գրիգոր Սիմսիրողլու, Նշան Դևեդջյանի և այլ բարեգործների աջակցության շնորհիվ:
Թումո ստեղծարար տեխնոլոգիաների կենտրոնից տեղեկացնում են, նախատեսվում է, որ կենտրոնի շինարարությունը կմեկնարկի այս տարվա սեպտեմբերին, իսկ ուսումնական գործընթացը կսկսի 2018 թվականին: Այն նախատեսված կլինի առնվազն 600 ուսանողի համար։ Կենտրոնում կիրականացվի նույն ծրագիրը, և կդասավանդեն նույն մասնագետները, ինչ Երևանի, Դիլիջանի, Գյումրիի և Ստեփանակերտի Թումոներում, ինչպես նաև Կողբ կհրավիրվեն միջազգային մասնագետներ, ովքեր իրենց փորձով կկիսվեն պատանիների հետ:
Թումոյի տնօրեն Մարի Լու Փափազեանը նշել է. «Թումոն տարեցտարի ավելի հասանելի է դառնում Հայաստանի զանազան հատվածներում բնակվող պատանիների համար: Կողբ հիմնադրամի հետ այս համագործակցությունը հատկապես ենք կարևորում, քանի որ այն՝ մի քանի համայնք միավորելով, հնարավորություն կտա Թումոն տարածել ավելի փոքր բնակավայրերում: Կողբի Թումոն կընդգրկի ոչ միայն Կողբի, այլ նաև Նոյեմբերյանի, Բերդավանի և մոտակա գյուղերի պատանիներին, ովքեր կկարողանան մասնագիտանալ և արդիական հմտություններ ստանալ, ինչպես նաև ապագայում աշխատել տեղում և առցանց, առանց լքելու իրենց ծննդավայրը և զարգացնելով այն»:
«Կողբ» հիմնադրամի հոգեբարձուների խորհրդի նախագահ Արման Բարսեղյանը վստահություն է հայտնել, որ 2018թ.-ին Տավուշի մարզի սահմանամերձ Կողբ, Բերդավան,Նոյեմբերյան և այլ համայնքների երեխաների համար դռները կբացի Թումո ստեղծարար տեխնոլոգիաների ժամանակակից կենտրոնը, ինչը կնպաստի երեխաների արտադպրոցական կրթությանը և մրցունակությանը, ինչպես նաև այդ համայնքներում ընդհանրապես կյանքի որակի բարելավմանը»:
Կողբի Թումոյի ուսանող կկարողանան դառնալ 12-18 տարեկան պատանիները: Ուսումը կենտրոնում՝ ինչպես և բոլոր քաղաքների Թումոներում, անվճար կլինի:
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
