Ձեր վստահելի աղբյուրը

«Զերծ մնացեք պիտակավորումներից, ինչ գրում եք, լավ ստուգեք՝ հասկանալով, թե ինչ բացասական հետևանքներ կարող է լինել ձեր գրածից»,-այսօր լրագրողների հետ հանդիպմանը նման նկատառում արեց կառավարման փորձագետ Հարություն Մեսրոբյանը՝ անդրադառնալով Երևանում տեղի ունեցող իրադարձությունների մասին մեկնաբանություններին:

«Մեծ վտանգ ունենք, որ եթե լինեն որոշակի փոփոխություններ, չգիտեմ ինչ խորության, հանկարծ չընկենք այն վիճակին, ինչ կար 1991 թվականին՝ այսինքն դժգոհ լինելով նախորդ համակարգից՝ ստեղծեցինք մի համակարգ, որից էլ ավելի դժգոհ կլինենք: Սա կարևոր է»,- մատնանշեց  կառավարման փորձագետը:

Նրա խոսքերով՝ այսօր ունենք վարկաբեկված գործիչների շարան, որոնք պարզապես չպետք է երևան, չպետք է մոտենան բարձրախոսին, սա կլինի դեստրուկցիա բոլոր ասպարեզներով. «Այսօր հանրություն, հասարակություն բառերը պետք է շպրտել մի կողմ, սա մեր ազգի ապագայի խնդրին է, որովհետև 7,5 միլիոն սփյուռքահայերի ճակատագիրն էլ այսպես թե այնպես կապված է Հայաստանի հետ, պետք է խոսել հայերի մասին, ոչ թե հասարակության»:

Լրագրողների հարցի, թե արդյո՞ք մենք ունենք չվարկաբեկված գործիչ, բանախոսն ասաց, որ  պետք է ման գալ չվարկաբեկված գործիչների, ման գալ տարբեր ոլորտների մասնագետների, այն ինչ 25 տարվա մեջ պետք է արած լինեինք ու դա մեր առջև դրված խնդիրը պետք է լիներ. «Պետական կառավարումը մասնագիտություն է, մենք պետք է մասնագետներին հրավիրենք, գտնենք նրանց, երբեք պրոֆեսիոնալները չեն իջնի ասպարեզ, քանի որ նրանք ինքնաբավ են: Երբ մեզ մոտ ավտոմեքենայի շարժիչը փչանում է, մենք չենք գնում լավ մարդու մոտ, ծանոթ մարդու մոտ, մենք գնում ենք լավ իմացողի մոտ: Եթե հերթական անգամ պետական կառավարման մեջ մտցնելու ենք ոչ պրոֆեսիոնալների, ուրեմն  մենք չենք ուզում որ մեր պետությունը «քշվի»:

Մեսրոբյանի կարծիքով՝ ՊՊԾ գնդի գրավված տարածքում պետք չէ տեխնիկական հարցերով իրավիճակն ավելի սրել. «Բոլոր այն հարցերը, որոնք տեխնիկական են և հենց հիմա կարելի է լուծել, պետք է լուծել, սնունդ, դեղորայք, կապ, բուժօգնություն: Պետք չէ շիկացած վիճակում արհեստական պրոբլեմներ ստեղծել»:

Տեղի ունեցող իրադարձություններից Հարություն Մեսրոբյանը սցենարների երկու ամենավատ և ամենալավ տարբերակն առանձնացրեց. «Ամենավատի դեպքում կլինի արյունահեղություն և փաստորեն երկրի՝ Հայաստանի և Արցախի շեշտակի թուլացում բոլոր հետևանքներով: Ամենալավը, եթե հանկարծ հայտնվի մի թիմ, որը հենց այսօր կարող է երկրի կառավարումը վերցնել իր ձեռքը, սակայն այստեղ ես մտավախություն ունեմ, և զարգացումներն էլ ցույց են տալիս, որ նման թիմ փաստացի չկա: Ողջ ազգը տատանումների մեջ է, պրովոկացիոն ելույթներն պետք չեն, օրինակ, երբ ասում են պետք է տեռորիսներին ոչնչացնել, գործակալներին գնդակահարել, սա ահավոր է»:

Արտաքին ազդեցությանն անդրադառնալով՝ փորձագետը հավելեց. «Ճգնաժամի ճամանակ միշտ ակտիվանում են արտաքին ուժերը և սկսում են ասել՝ «Ռուսաստանը մեր անվտագության երաշխավորն է», «Արևմուտքը մեզ տանում է դեպի քաղաքակիրթ ոլորտ», սրանց մի հավատացեք, աշխարհում տեսականորեն էլ չկա որևէ գերպետություն, որևէ ուժ, որը գիշերը քնած երազում է հզոր Հայաստանի մասին: Անգամ ամենաանտարբեր հայն ի վերջո ինքն ուզում է սրտի խորքում հզոր Հայաստան, որը ոչ մի արտաքին ուժի պետք չի, քանի որ այն պահից, երբ Հայաստանը դառնա գործոն, խանգարելու է հենց նույն ուժերին: Գերտերությունների հետ ոչ պետք է կռվել, ոչ էլ նրանց փեշի տակ մտնել»: